Mi-overtake sa trak patay

CEBU, Philippines - Napigsat ang usa ka 20-anyos nga lalaki human madasmagi og 10- wheeler truck ang motorsiklo niining gisakyan dihang gikatahong misuway sa pag- overtake sa national highway sa barangay Calajoan lungsod sa Minglanilla niadtong Miyerkules sa alas 7:30 sa buntag.

Ang biktima mao si Survilla Juanito Jr., 20, minyo ug molupyo sa Cabancalan, Bulacao Cebu City. Samtang ang drayber sa trak nga nakaligis mao si Gerado Porferio, taga barangay San Benito Calatrava Negros Oriental.

Matud pa ni PO1 Raymund Hortezuela sa Minglanilla Police dihang nahinabi sa Banat News, ang trak ug ang motorsiklo         pulos paingon sa siyudad sa Sugbo.

Giingong misuway og overtake ang biktima ug naatol nga miliko sa wala nga bahin ang nahaunang sakyanan nga gisundan sa trak hinungdan nga mi-menor ang naulahi apan   nadasmag na hinoon ang motorsiklo kaniya.

Nasuta sa imbestigasyon nga nalatayan sa ligid sa trak ang lawas sa biktima hinungdan sa kamatayon niini.

Human sa hitabo ang biktima gisuwayan pa unta og hatud sa Minglanilla District Hospital apan gideklarar nga dead on arrival, samtang mitahan usab si Porferio ngadto sa kapolisan.

 Sa laing disgrasya, patay ang usa ka 63-anyos nga drayber sa traysikol human madasmagi og multicab atol sa iyang pagtabok sa karsada didto sa Poblacion lungsod sa Liloan niadtong Miyerkules sa alas 9:00 sa buntag.

Ang biktima mao si Martinez Antolihaw Libot-libot, 63, molupyo sa barangay Catarman sa maong lungsod, samtang ang drayber sa multicab nga pasaheroan mao si John Huerte Manatad, 24, taga sitio Bajac Poblacion.

Matud pa ni PO1 Ronald Rosello sa Liloan Police dihang nahinabi sa Banat News ang maong multicab paingon sa amihanan dihang kalit milabang ang biktima hinungdan sa pagkapunggit niini.

Daling gihatud ang biktima sakay sa ambulansiya sa lungsod lahos sa Vicente Sotto Memorial Medical Center (VSMMC) apan gideklarar sa mga doctor nga dead on arrival, ang drayber mitahan sa kapolisan. – BANAT NEWS