Suspetsadong tulisan nasikop
CEBU, Philippines - Mikagulkol sa prisohan ang usa ka suspetsadong tulisan human masikop sa mga polis gikan nga nanulis niadtong miaging gabii didto sa sitio Neighborhood, barangay Tabunok, dakbayan sa Talisay.
Ang nagpahayahay karon sa prisohan mao si Reymierse Ando, 25, nga taga barangay Veto, lungsod sa Minglanilla .
Si Ando gitabangan og gukod sa mga molupyo human niya tulisa si Anabelle Barte, 28, nga taga Neighborhood ug kawani sa Gaisano Fiesta Mall, Tabunok.
Base sa imbestigasyon sa kapolisan, nasayran nga si Barte naglakaw paingon nang mopauli gikan sa trabaho dihang kalit lang siyang giti-onan og kutsilyo ni Ando ug gikuha ang iyang cell phone nga nagkantidad og P8,300.
Nangayo og panabang si Barte, busa gigukod sa mga tawo ang suspetsado, unya nahiatol usab nga nagpatrolya sila si PO3 Alfredo Cuizon, PO2 Jundave David ug PO2 Gerard Larong duol sa maong lugar busa dali kaayong nasikop nila si Ando.
Nabawi sa kapolisan ang cell phone gikan kang Ando nga gipanag-iya ni Barte.
Naglaraw ang biktima nga mosang-at og kaso batok sa suspek. – BANAT NEWS
- Latest
- Trending
