Indian giluba sa ig-agaw

CEBU, Philippines - Nabulit sa dinunggaban ang lawas sa usa ka Indian human kini unaya og luba sa ig-agaw ra usab niyang Indian national gihapon didto sa Radja Town Homes sa sitio Soong, barangay Mactan, dakbayan sa Lapulapu sa miaging gabii.

Ang biktima mao si Jucumbjin Singh, samtang ang suspek mao ang iyang ig-agaw nga si Randir Singh, pulos hingkod, ug pulos temporaryong nagpuyo sa nahisgotang dapit.

Si SPO2 Rolito Jumao-as sa homicide section sa kapolisan sa maong dakbayan miingon nga nag-inom ang biktima ug ang suspetsado uban sa ilang mga bisita nga mga Indian usab sulod sa ilang balay dihang mitumaw ang panaglalis sa duha.

Sugo sa kalasbag wala kapailob ang suspetsado ug mikuha kini og kutsilyo sa kusina ug gitusaktusak ang lawas sa biktima.

Gihatod dayon ngadto sa Mactan Doctors’ Hospital ang biktima samtang nasikop usab dayon ang suspek ug karon nagpahayahay na kini sa bilanggoan. – BANAT NEWS