Manager gipusil patay sud sa tindahan

CEBU, Philippines - Nakabsan sa kinabuhi ang usa ka manager human kini masabak sa mga bala gikan sa armas sa wala hiilhing kriminal nga mipusil kaniya sulod sa tindahan nga iyang gidumala didto sa barangay Cansaga, lungsod sa Consolacion sa miaging hapon.

Ang biktima mao si Retchie Herrera Oybines, 25 , ulitawo nga taga barangay Mabini, sa barangay Pit-os, dakbayan sa Sugbo kinsa maoy manager sa PBC Cycle Parts nga nahimutang sa barangay Cansaga.

Si SPO4 Joseph Yongco sa kapolisan sa nahisgotang lungsod miingon nga ang biktima kauban sa duha niya ka mga kawani nga sila si Reymart Dungog, ug Carmina Herrera nga pulos hingkod ang panuigon, diha sa sulod sa tindahan sa maong higayon.

Dihang kalit lang mitungha ang wala hiilhing lalaki nga may pamarog nga 5’6” ang gitas-on, ug gibanabanang may 30 anyos kapin ang panuigon ug kasarangan ang gidak-on sa panglawas ug nagpakaaron-ingnon nga kustomer.

Busa gi-abi-abi dayon kini sa biktima sa pagtuo nga tinuod kining kustomer apan sa kalit, milanit kini sa iyang giluklok nga armas de fuego ug diha-diha gipusil ang biktima sa makadaghang higayon.

Ang biktima kinsa nasabak sa dughan, abaga ug sa hawak, dali kaayong nalup-og uban sa mibanaw nga dugo gikan sa iyang lawas, samtang ang kriminal dali kaayong nakabiya sakay sa nagpaabot nga motorsiklo sa atbang sa tindahan ug misirit paingon sa lungsod sa Liloan.

Gihatod usab dayon ang biktima ngadto sa Eversely Child Sanitarium sa barangay Jagobiao sa dakbayan sa Mandaue apan giingong gideklarar kining dead on arrival.

Si SPO4 Yongco miingon nga sa crime scene ilang napalgan ang tulo ka mga kabhang ug tulo usab ka mga tingga sa bala sa kalibre .45 nga pistola nga gituohang maoy gigamit sa pagpusil patay sa biktima. Padayon pang giimbistigar  karon sa kapolisan ang maong kaso. – BANAT NEWS