CEBU, Philippines - Napulo’g tulo ka mga sakop sa pamilya sa mga nangamatay sa duha ka sunodsunod nga aksidente sa dakbayan sa Toledo nakadawat og hinabang pinansiyal gikan sa kagamhanan sa lalawigan sa Sugbo kagahapon sa buntag.
Silang Gob. Gwendolyn Garcia, mga bokal Alex Binghay, Julian Daan ug Sergio Restauro ang nang-apod-apod sa mga asawa, anak ug ginikanan sa mga nangamatay sa aksidente sa barangay Poog ug Lutopan sa naasoy’ng siyudad.
Ang nakadawat og tag-P5 mil matag usa mao sila si Danilo Mainit nga bana sa namatay’ng si Julieta Mainit; Arlinda Roble nga inahan ni Ariel Roble; ug Juan Sitoy nga amahan ni Efren Sitoy.
Silang Julieta, Arlinda ug Juan nangamatay atol sa pagkabulag sa container van gikan sa trailer truck nga nawad-an og preno pag-abot sa atubangan sa Simbahang Katoliko Romano sa barangay Poog.
Ang nakadawat og laing tag-P5 mil ang mga sakop sa pamilya sa namatay atol sa pagdasmag sa V&JA bus sa konkreto nga koral sa national highway sa sitio Don Andres Soriano Uncrona, barangay Lutopan.
Sila mao si Jessica Rosal nga inahan sa namatay’ng si Danica Rosal; Florame Olivo nga apo ni Felicidad Arnibal; Dorina Bueno nga anak ni Jose Bueno; Antonietta Colegado nga asawa ni Teofilo Colegado; Profetesa Agsoy nga asawa ni Maximo Agsoy.
Norma Calunod nga inahan ni Flordelez Benting, apohan nila ni Cyril Benting ug Sian Vincent Basarte; Lilia Lawas nga live-in partner ni Alfredo Pacillos; Rufino Capacite nga inahan ni Mary Jane Capacite; Marivic Vega nga inahan ni Junavie Vega; ug Diomedes Cabanero nga bana ni Romela Cabanero. – BANAT NEWS