Lima ka trainee anaa sa ICU

CEBU, Philippines - Lima sa 18 ka polis trainees nga naigo sa kilat niadtong Martes  sa udto didto sa bukiran sa lungsod sa Sibonga anaa karon sa Intensive Care Unit (ICU) sa South General Hospital (SGH) sa dakbayan sa Naga.

Si PRO-7 Chief Supt. Lani-O Nerez mibutyag kagahapon sa mga tigbalita nga sa 18 ka police trainees, lima sa onse niini nga anaa sa SGH gibalhin sa ICU sa miaging gabii, samtang ang laing pito anaa pa sa PNP Regional Health Service nga nahimutang sa Gorordo Avenue sa barangay Camputhaw ning siyudad.

Ang lima na ICU mao sila si PO1 Wilfredo Aparece, PO1 Edmund Sumalinog, PO1 Mark Joel Molina, PO1 Barry Entea og PO1 Aidren Laurente samtang ang unom gikatakda nang mogawas kagahapon sa hapon sa maong tambalanan ug mobalik na ngadto sa Regional Mobile Group (RMG)-7 headquarters.

Si Chief Insp. Floriser Radaza, Chief Clinic Services sa PNP Regional Health Services diin anaa ang laing pito nga police trainees nagkanayon nga sa pito, tulo ang padayon nilang gi-obserbahan nga sila si PO1 Darryl Mark Biolangco, PO1 Sylvano Bascones ug PO1 Richard Cababat.

Matud ni Radaza ang upat gikatakda nga makagawas na kagahapon sa hapon ug ibalik na ngadto sa headquarters sa RMG-7.

Si Nerez mipasabot nga ang pagbalhin sa lima ngadto sa ICU sa SGH wala magpasabot nga delikado ang ilang kahimtang kundili aron lang maklaro ang pagmonitor sa ilang kahimtang.

Subling giklaro ni Nerez nga usa lang kadto ka hitabo nga dili gyud matag-an sanglit iya man kadto sa kinaiyahan ug nataymingan lang gyud nga naigo sa kilat ang mga police trainees samtang sila naniudto sa usa ka kalibonan bahin sa sitio Camasilis, barangay Lamakan, lungsod sa Sibonga. – BANAT NEWS