PDEA-7 mihimakak nga nag-operate sa barangay Gairan sa dakbayan sa bogo

CEBU, Philippines - Kusganong gihimakak sa Philippine Drugs Enforcement Agency-7 nga duna silay gihimong operasyon sa barangay Gairan sa dakbayan sa Bogo niadtong Domingo nga diin tulo ka mga gidudahang drug pushers ang giingong misuborno kanila ug ilaha usab dayong gibuhian. Subay sa gipadangat nga text message sa Banat News ang tulo ka mga batan-on nga gidakop sa mga PDEA personnel sa Gairan, Bogo naila lang sa pangalan nga Mark (apelyedo gipugngan) usa ka ginganlan og Jason ug ang usa ka wala mailhing lalaki.

Ang text nagkanayon nga ‘gibuhian’ human mobayad ang tulo ug mibutyag nga mismong ang Bogo police station adunay blotter sa maong operasyon.

Apan sa pakighinabi sa Banat News gihimakak sa tigpamaba sa PDEA-7 nga si Jessie Tabanao nga duna silay operasyon nianang adlawa diha sa maong dakbayan.

Samtang ang imbestigador sa Bogo City Police nga si PO3 Allan Dosdos mipadayag dihang nahinabi sa Banat News nga wala silay kasayuran kabahin sa gilusad nga operasyon sa PDEA-7 sa maong dakbayan nianang adlawa ug wala say na-blotter nga susamang mga pangalan nga nadakpan. Matud pa ni PO3 Dosdos nga makahimo og operate ang mga sakop sa PDEA sa ilang lugar bisan og dili mo-coordinate ngadto nila paglikay nga posibleng mabulabog ang operasyon.

Nagduda si Tabanao nga dunay mga grupo sa mga mapahimuslanon nga migamit sa ilang pangalan alang sa ilang kaugalingong interes. Dili lang kini maoy labing unang higayon nga gipasanginlan ang PDEA-7 og susamang alegasyon.

Si Tabanao nagkanayon nga mohimo sila og pakisusi sa maong report aron pagtino sa kabalido sa maong report ug aron paglimpyo sa pangalan sa ilang ahensiya gikan sa mga mapahimuslanong migamit sa ilang pangalan.

Ang officer –in charge sa PDEA nga si Mauro Licen pinaagi ni Tabanao miawhag sa texter sa pagpadangat og pormal nga reklamo batok sa ilang buhatan aron usab ilang lutuson ang ilang mga ahente.

Matud pang Tabanao andam ang PDEA-7 nga ipa-lineup ang tanan nilang mga ahente aron mailhan kun si kinsay mga scalawag sa ilang mga sakop ug aron makasuhan.

Apan kagahapon dihang gi-trace ang numero sa texter ug gitawgan gipawong niini ang cellphone ug wala na motubag, giklaro ni Tabanao nga mahimo rang mohatag og impormasyon ang texter bisan og dili kini magpaila sa iyang pangalan apan wala na kini mousab og abli sa iyang cellphone.