Maestro 'nagpusil' sa tampihak namatay

CEBU, Philippines - Patay ang usa ka magtutudlo sa pampublikong tulunghaan nga gituohang naghikog pinaagi sa pagpusil sa iyang kaugalingon sa sulod sa ilang panimalay diha sa dalan S. Osmeña sa barangay Gun-ob, dakbayan sa Lapulapu alas 7:45 ang takna sa buntag sa miaging Domingo.

Ang namatay mao si Eldebrando Pestaño, 45, nagpuyo sa nahisgutang dapit ug magtutudlo sa Gun-ob National High School sa nahisgutang barangay.

Si SPO2 Rolito Jumao-as sa Crime Against Person Desk sa kapolisan sa maong dakbayan miingon nga nakaplagan si Pestaño sa iyang mga kabanay nga nagbuy-od na ug naligo sa kaugalingong dugo sa sulod sa lawak sa ilang panimalay.

Dugang pa niya nga nakabaton kini og samad pinusilan sa tuong tampihak ug gituohang nagpusil sa iyang ulo ginamit ang kalibre .9mm nga armas nga napalgan tupad usab sa nagbuy-od niining lawas.

Ang mga kabanay daling mikarga kaniya sa ambulansya sa Emergency Rescue Unit Foundation (ERUF) sa Mactan Doctors Hospital sa barangay Basak apan gideklarar kini sa mga doktor nga dead on arrival.

Si Jumao-as miingon nga ang pamilya walay laing nakitang hinungdan sa paghikog ni Pestaño gawas na lamang sa giatubang nga suliran sa kwarta sa ilang pamilya niining panahona.

Si Jumao-as miingon nga ang mga sakop sa pamilya ni Pestaño nga maoy unang nakaplag sa nagbuy-od nga lawas niini nakakuha og suicide note sa bulsa niini apan wala pa kini gi-turnover kanila atol ning pagsulat sa balita aron masusi.

Samtang ipailawom sa eksaminasyon ang kalibre .9 mm nga pistolang gituohang gigamit niini sa paghikog ug aron usab pagtino kun aduna ba kini papeles ug kang kinsa kini.

Girekomendar usab sa kapolisan nga ipa-awtopsiya ang patay’ng lawas aron pagsiguro nga walay foul play sa kamatayon niini.   – BANAT NEWS