Maguwang gi-shotgun, gipuspusan patay

CEBU, Philippines - Patay ang usa ka lalaki human kini giunay pag-shotgun ug gitiwasan pinaagi sa pagpuspos sa ulo niini sa iyang manghud tungod sa bangi sa yuta niadtong Sabado sa buntag diha sa sitio Tugop, barangay Lipanto, lungsod sa Alegria.

Ang biktima nga si Marcial Ybas, nagpuyo sa maong lugar nakaangkon og samad pinusilan sa dughan ug samad pinusposan sa ulo daling gidala ngadto sa Reinhard Wartgen Hospital diha sa nahisgutang lungsod apan nakabsan gyud kini sa kinabuhi.

Ang suspetsado nga si Vicente Ybas, 38, manghud sa biktima, nagpuyo usab sa maong dapit boluntaryong mitahan ngadto sa mga polis.

Si SPO3 Rotillo Pardona officer-in-charge sa Alegria Police Station base sa gihimong imbestigasyon nila ni SPO1 Romelito Obligado, PO3 Renato Abellar ug PO1 Jevy Erojo bangi sa yuta ang unang nakitang motibo sa krimen.

Si PO1 Erojo nga nahinabi sa Banat News kagahapon nagkanayon nga niadtong Sabado mitahan ang suspetsado nga gikuyogan sa paryenteng tanod sa barangay Lipanto.

Lakip sa gitahan sa suspek mao ang shotgun nga gigamit niya sa pagpusil sa iyang maguwang kansang butt naliki tungod kay mao kini gipuspos sa suspek ngadto sa ulo.

Ang sitio Tugop gikan sa barangay Poblacion dunay gilay-ong 15 ngadto sa 20 ka kilometros daling giadto sa mga polis diin ilaha pang naabtang buhi ang biktima diha sa balay sa suspetsado ug gidala ngadto sa nahisgutang tambalanan, kagahapon sa buntag nakabsan kini sa kinabuhi.

Gibutyag usab ni Erojo nga ang biktima ulitawo ug magbalhin-balhin og puyo sa ilang mga paryente ug usahay anha usab mosaka sa balay sa suspetsado tungod kay wala na silay mga ginikanan apan adunay kabiling yuta kanilang duha. Niadtong adlawa ang biktima diha sa balay sa suspek ug nagkalalis na usab kabahin sa yutang kabilin, gikatahong mibuhi og pulong ang biktima nga iyang ‘kilawon’ ang atay sa suspetsado kun ipamugos ang pangangkon niini sa yuta.

Kini maoy hinungdan nga nasuko ang suspek ug mikuha sa maong shotgun dayong pusil sa biktima diha sa dughan, tungod kay wala man kini maantimano giingong gipusposan niini sa butt sa maong armas ang biktima. – BANAT NEWS