CEBU, Philippines - Usa ka beterano sa Ikaduhang Gubat sa Kalibutan ang napalgang patay sulod sa iyang lawak nga gituohang gitulis pasado alas-6 sa buntag kagahapon sa sitio Botong barangay Sudlon 2.
Ang biktima nailhan nga si Pedro Kamelo, 84, molupyo sa nahisgutang lugar kinsa nakaangkon og samad dinunggaban sa iyang apapangig, tinigbasan sa iyang tuong ulo ug samad usab sa iyang ngabil.
Sa pakighinabi sa Banat News ni Melecio Bacalso, 66, caretaker sa panimalay sa biktima kini mibutyag nga kagahapon sa buntag iyang gisangpit ang biktima apan wala kini musanong.
Hinungdan nga iyang gi-adto ang balay sa bayaw sa biktima nga si Joel Balili aron ipahibalong walay tawo sa balay ni Kamelo hinungdan nga si Balili misugo og laing tawo aron pakuyogan si Bacalso pagsusi sa iyang bayaw.
Matud pa ni Bacalso nga dihang misaka na siya sa gate niini iyang nasigpatan nga nagbuy-od na ang biktima sa iyang kama nga nagkadugo.
Hinungdan nga nagdali sila sa pagsulod sa balay ug sa ilang pagsusi sa lawak nakit-an nalang nila ang usa ka kutsilyo duol sa pultahan sa lawak ni Kamelo.
Si Balili kinsa miabot diha sa balay taud-taod pagkahibalo sa nahitabo daling mitawag sa kapolisan.
Dugang pa ni Bacalso nga adunay armas nga kanunay’ng dala-dalahon si Kamelo apan nahanaw na kini.
Gikatahong hasta ang mga ahalas ug ubang kabtangan nga gibana-banang mokabat sa P100 mil, ingon man ang bag-ohay lang niini nga gi-kubrang pension gikan sa Estados Unidos pagka-beterano niini atol sa ikaduhang gubat sa kalibutan nga dili mo-menus P20 mil.
Matud pa ni SPO3 Rey Cuyos sa Homicide Section sa pakighinabi sa Banat News nga posibleng aduna gyuy nahitabong pagpangawat base usab sa mga gipang-estorya sa caretaker sa biktima.
Dugang pa ni Cuyos nga magpatabang sila sa ilang imbestigasyon sa mga sakop sa Theft and Robbery Section (TRS) gumikan kay nagduda silang may kalambigitan nga tulis ang motibo sa krimen.
Kagahapon, duha ka mga tawo ang giimbitar sa kapolisan aron kuhaan og pamahayag. – BANAT NEWS