Hepe sa PNP nakigkita sa mga scubasurero

CEBU, Philippines - Personal gipakigtagboan ni PNP Chief Director General Jesus Verzosa ang mga sakop sa “Lapulapu City Police Scubasurero” sa Lapulapu City Police Office kagahapon sa buntag.

Atol sa pagbisita ni PNP Chief Verzosa dinhi sa Sugbu sa milabay’ng adlaw mihatag kini og higayon nga pakigkitaan ang mga scubasurero sa dakbayan sa Lapulapu.

Si Verzosa mikuyog sa scuba diving diha sa Isla Nalusoan ug Hilutongan habig sa lungsod sa Cordova ug midayeg sa mga lokal nga awtoridad ug sa mga molupyo nga nagpabiling himsog ang mga gasang sa maong dapit.

Gikalipay kini ni Verzosa gumikan kay iyang nakita ang maayong resulta sa pagpreserbar niini pinaagi sa pagpakgang sa mga ilegal nga panagat sa maong dapit.

Ang kapolisan sa dakbayan sa Lapulapu adunay 41 ka mga police divers nga gipangulohan ni Lapulapu City Police Office Director Sr. Supt. Mariano Natu-el Jr. ug 20 ka mga divers kagahapon ang kuyog ni Verzosa sa maong kalihukan.

Lakip sa miabag sa maong kalihukan mao ang mga professional divers gikan sa Coral Point Dive sa dakbayan sa Lapulapu ug uban sa tag-iya niini nga si Emiterio “Emie” Bonghanoy.   (BANATNEWS)