Natagak sa lubi namatay

CEBU, Philippines - Patay ang usa ka mananggiti human mahagbong sa puno-an sa lubi nga dunay gibana-banang gitas-ong 45 ka tiil diha sa barangay Panganihan siyudad sa Toledo niadtong Biyernes sa alas 12:00 sa udto.

Ang patay nang nadangat sa tambalanan mao si Jaime Ebardo, 64, molupyo sa nahisgutang lugar kansang panginabuhian gawas sa pang-uma mao ang pagpananggot og tuba.

Matud pa ni SPO4 Gil Lastimosa sa Toledo City Police dihang nahinabi sa Banat News ang biktima nanguha kini og mga bunga sa lubi niadtong higayuna ug dihang gisaka niini ang labing taas nga punoan sa lubi na-aksidente nga natapigas ang tiil niini ug natagak.

Ang igsoon sa biktima nga nakabantay sa pagkatagak niini daling mitabang apan sa iyang pagsusi wala nay panimuot si Ebardo kansang lawas nakaangkon og daghang samad ug pangos sa nawong ug kalawasan ug nabalian og tiil ug kamot.

Gisuwayan pa unta sa mga kabanay niini pagdala kaniya sa Toledo City District Hospital apan gideklarar kini nga dead on arrival (DOA).  (BANATNEWS)