Milikay Sa Kimba Misampak Sa Trak

CEBU, Philippines - Laing aksidente sa kadalanan sa dakbayan sa Toledo ang nahitabo kagahapong adlawa human nawad-an sa preno ang usa ka sakyanan sa Visayan Electric Company ug mibangga sa gikasugat nga dump truck aron dili mahagbong sa kimba.

Nahitabo kini sa barangay Upper Media Onse alas-7 sa buntag diin ang nagkabangga nga sakyanan mao ang service VECO nga gimaneho sa drayber nga si Balfred Lapano, 41, kasamtangang nagpuyo dinhi sa siyudad sa Sugbo.

Samtang ang drayber sa dump truck mao si Maximo Payusam, 45, molupyo sa Bayabas lungsod sa Argao.Hinuon ang duha swerteng walay nangaangol o nakalas.

Matud ni PO3 Julius Sanchez, Traffic Investigator sa Toledo City Police subay sa imbestigasyon ang trak nagdulhog kini nga posisyon samtang ang dump truck paingong nagtungas.

Apan pag-abot sa duha ka sakyanan sa kurbadahong bahin aksidenteng nagkabangga ang sakyanan sa VECO sa gikasugat niining dump truck.

Subay sa pagsukit-sukit sa drayber sa VECO giangkon niining nawad-an siya og preno apan sa kahadlok nga mahagbong sa kimba iyaha nalang gidasmag ngadto sa gikasugat nga dump truck.

Ang kimba nga gilikayan ni Lapano gibana-banang 10 ka metros kun 30 ka tiil.

Niadtong miaging semana 15 ka pasahero ang patay ug 65 ang nangaangol human mobangga sa sementadong paril ang V&JA Bus Line sa pamilyang Corominas human mawad-i og preno ang sakyanan niini.

Samtang ang unang panghitabo mao ang disgrasya usab sa trailer truck nga nawad-an gihapon og preno tulo ka semana na ang milabay diha sa Poog siyudad sa Toledo nga mikalas og upat ka kinabuhi ug walo ang angol human matagak ang container van niining karga.