Magtiayong tiguwang gitigbas

CEBU, Philippines - Samdan ang magtiayong tiguwang human kini gipanigbas sa ilang silingan tungod lang sa away sa utlanan sa ilang mga yuta pasado alas-9 sa miaging buntag sa sitio Kabil-isan barangay Bahigan lungsod sa Badian.

Ang mga biktima mao sila si Potenciana Saldua, 80, ug ang bana niining si Eliazar Saldua, 84, molupyo sa nahisgutang lugar nga usa ka mag-uuma.

Samtang ang suspetsado nailhan nga si Gaudencio Benemerito, 81, molupyo usab sa maong lugar.

Sa pakighinabi sa Banat News ni PO3 Geremias Elardo, desk officer sa Badian Police kini mibutyag nga samtang nagbantay ang magtiayon sa ilang trabahanteng nag-uma sa ilang yuta sa nahisgutang dapit kalit lang nga mitim-aw ang suspetsado.

Sa walay igong hinungdan gidiretso niini og tigbas sa gibitbit nga garaw si Eliazar sa iyang tuong abaga pagkahuman gihapsan usab niini sa gidalang garaw si Potenciana duha ka higayon diha sa abaga.

Human sa pagpanigbas daling miikyas ang suspek apan mitahan diretso ngadto sa Badian Police Station samtang ang magtiayong Saldua gidala sa Badian District Hospital apan gibalhin sa usa ka pribadong tambalanan sa dakbayan sa Sugbu.

Matud pa ni PO3 Elardo nga ang panagbangi tungod sa utlanan sa yuta maoy hinungdan sa pagpanigbas sa suspetsado kini tungod kay kaniadto paman nagsige na sila og away kabahin niini.

Gani niadtong miaging semana ang magtiayon ug ang suspetsado nagkaabot sa barangay hall kini aron unta husayon ang ilang panagbangi apan wala kini mahusay nga miresulta sa duguon nga panghitabo.   (FREEMAN NEWS)