Wala kabayad utang - gipatay

CEBU, Philippines - Gipusil patay sa usa ka lalaki ang iyang higala human kini magdumili sa pagbayad sa iyang utang diha sa sitio Ihawan sa barangay Mantuyong dakbayan sa Mandaue sa milabay’ng hapon.

Namatay sa tambalanan ang biktimang si Arnel Arnelia, 27, residente sa maong dapit samtang ang mipusil kaniya nga iya rang higala mao si Kimkim Judilla, 24, ug residente usab sa maong dapit.

Matud pa ni PO2 Arthur Cuyos sa pasiunang imbestigasyon sa kapolisan sa Station 1 sa Mandaue City Police Office, gipaninglan si Arnelia ni Judilla sa iyang utang nga balor P3 mil.

Apan sumala pa ni Cuyos gikatahong wala makabayad ang biktima ug giingong nasuko ngadto sa suspek hinungdan sa pagtumaw sa ilang mainitong panaglalis hangtud nga mibunot og kalibre .45 si Judilla ug mipusil sa biktima.

Si Arnelia nga nahiagom og duha ka samad pinusilan sa iyang dughan ug sa duha ka mga bukton gidali pagdala sa Mandaue City Hospital ug gibalhin sa Vicente Sotto Memorial Medical Center.

Pipila ka gutlo sa pag-atiman sa mga mananambal gikatahong nakabsan gyud si Arnelia sa iyang kinabuhi gumikan sa iyang mga samad nga naangkon.

Samtang dali usab nga nakapahilayo si Judilla sa maong dapit ug wala na maabti pa sa mga mirespondeng mga polis diha sa iyang balay.

Matod pa ni PO2 Cuyos nga kasong murder ang posibleng ilang ipasakang kaso batok ni Judilla.   (BANATNEWS)