Gituohang kawatan gipusil sa tanod

CEBU, Philippines - Samdan ang usa ka gituohang kawatan human kini pusila sa usa ka barangay tanod didto sa sitio Ponce Hall, sa MJ Cuenco, barangay Mabolo, ning dakbayan sa Sugbo sa miaging kaadlawon.

Ang biktima nailhan nga si Jimboy Cañete, 19, nga taga dalan Tutud, sa barangay Mabolo, ug usa ka helper sa junk shop, samtang ang suspetsadong tanod mao usab si Wilfredo Wasawas, 56, nga taga Mabolo.

Sumala sa kapolisan nga sa sayo pa ang suspetsado uban sa iyang mga kaubang tanod nag-roving sa nahisgutang lugar dihang nasigpatan nila ang biktima nga nagpas-an og usa ka airconditioning unit.

Tungod sa kakurat niini kay may mga tanod,   nabuhian sa biktima ang iyang dala ug napusdak ang airconditioning unit sa yuta busa gipusil siya sa suspetsado.

Ang biktima kinsa samdan sa paa gihatod dayon ngadto sa Cebu City Medical Center samtang ang suspetsado mitahan usab dayon ngadto kang PO3 Neri Cahimat sa Mabolo Police Station.  – BANAT NEWS