Kasong Masangkay may suspek na

CEBU, Philippines - Ang kapolisan sa dakbayan sa Talisay may suspect na sa kamatayon ni kanhi Regional State Prosecutor Hernando Masangkay.

Si Superintendent Henry Biñas, hepe sa Talisay City Police Station mibutyag sa mga tigbalita kagahapon nga tungod sa ticket sa lotto may kahayag na ang ilang imbistigasyon.

Apan dili una nila ikabutyag ang ngalan sa suspetsado hangtud nga kapasakaan kini og kaso. Matud sa hepe nga padayon pa silang nangapkap og dugang mga ebidensya batok sa suspetsado kinsa giingong usa sa tulo ka mga lalaki nga nakitang nag-inom sa sulod sa balay sa biktima. Giangkon sa hepe nga naglisod sila sa pagsulbad sa maong kaso tungod kay walay nakatug-an kinsay kauban ni Masangkay sa wala pa kini patya.

Gibana-bana nga niadtong Hunyo 25, 2010 sa pasado   alas 10:00 sa gabii gipatay ang biktima sa sulod sa iyang kwarto sa iyang balay sa Phase 3D, Camella Homes, barangay Lawaan I, dakbayan sa Talisay.

Si Masangkay kinsa nakaangkon og samad dinunggaban sa walang bahin sa abaga ug li-og, base sa autopsy sa Philippine National Police Crime Laboratory gituohang gidut-an og unlan ang nawong una kini lubaa tungod sa luta sa unlan nga nakita diha sa iyang nawong.

Matud ni Biñas nga dihang nangita sila og dugang mga ebidensiya nga magamit sa ilang imbestigasyon napalgan nila ang ticket sa lotto nga adunay petsang Hunyo 25, 2010 ug napalit kini sa biktima pasado alas 4:00 sa hapon sa maong adlaw.

Ang maong ticket didto palita ni Masangkay sa outlet nga nahimutang sa usa ka mall sa dakbayan sa Sugbo.

Midugang si Biñas nga uban sa iyang sakop miadto sila sa maong mall ug gihangyo ang chief security guard nga pakit-on sila sa na-record nga video sa CCTV cam diin ilahang nakita si Masangkay diha sa mall nga adunay kuyog nga usa ka lalaki.

Sa laing bahin, ang kapolisan sa Talisay nakakuha na og hulagway sa suspetsadong si Junrey Saloricman kinsa suspetsado sa pagtulis ug pagpatay kang Jermain Cerna, tag-iya sa FTL internet Café sa barangay Lagtang, dakbayan sa Talisay.

Si Biñas nagkanayon nga diha sa facebook nakuha ang hulagway ni Saloricman tungod kay wala kini biodata o uban pang mga dokumento nga gisumiter dihang misulod kini og trabaho sa maong internet café.

Si Saloricman kinsa giingong nakagawas na sa Sugbo uban sa wala hiilhing lalaki nga kauban niini padayon karong gipangita sa mga polis.   – BANAT NEWS