Mar midangop ngadto sa PET aron ipabasura ang proklamasyon ni Binay

CEBU, Philippines - Si kanhi Senador Mar Roxas kinsa napilde sa pagka-bise presidente niadtong milabay’ng eleksiyon sa Mayo 10, 2010, misang-at og protesta ngadto sa Presidential Electoral Tribunal (PET) aron ipa-walay bili ang proklamasyon ni kanhi Makati Mayor Jejomar Binay isip napiling bise-presidente sa nasud.

Sa 102 nga pahina sa protesta ni Roxas sa Liberal Party (LP) kini miawhag sa PET nga mopahigayon og manu-manong inihapay sa mga balota sa gibana-banang 3 milyones ka botos nga wala maihap.

Ang nahisgutang mga botos giingong gikonsiderar sa Comelec nga null votes o walay bili nga mga boto.

Gihangyo usab ni Roxas ang Tribunal nga mopahigayon og komprehensibong pag-analisar sa unang Automated Election System (AES) sa nasud.

Si Roxas nagkanayon nga ang certificates of canvass (COC’s) nga gibasehan sa proklamasyon ni Binay walay klaro tungod kay wala kini makatuman sa tanang legal nga rekisitos aron pag-ila sa katinuod niini nga midaog siya sa pagka-bise presidente, busa nakalapas kini sa Batakang Balaod.  – BANAT NEWS