7 ka koreano gidakop sa NBI-7

CEBU, Philippines - Pito ka mga Koreano nga giingong mga opisyal sa usa ka power corporation nga nagbase sa siyudad sa Naga gidakop sa mga ahente sa National Bureau of Investigation (NBI)-7 kagahapon sa udto sulod sa maong planta.

Ang mga ahente sa NBI-7 nga gipangulohan ni Agent Rey Villordon misikop nila ni Choi Sun Wok, Cha Sang Go, Kim Chan Gyu, Jang Jae Yeong ug Nam Ki Hoon, Lee Chan Gyu ug Choi Jin Young diha sulod sa usa ka power plant sa Naga.

Wala usab gibutyag kun unsa ang ilang gipanghuptang posisyon sa maong planta apan pulos sila giingong naghupot sila og dagkong posisyon sa mga sub-contractors nga kompanya nga konektado sa maong power corporation.

Ang pagkasikop sa pito pinasikad sa warrant of arrest tungod sa kasong estafa nga giisyu ni Judge Leoncio Janolo Jr. sa Regional Trial Court (RTC) National Capital Region Branch 264 sa Pasig City.

Ang korte mirekomendar og P60 mil nga piyansa alang sa pito ka mga Koreano alang sa ilang temporaryong kagawasan.

Apan sa warrant of arrest napulo ka mga Koreano ang dakponon nga naglakip nilang Lee Yeon Woo, Choi Young Bong ug Lim Bong Gil.

Si Villordon nga gikahinabi sa mga tigbalita mitug-an nga pasado alas 11:52 ilang nadakpan ang lima.

Nidugang siya nga ang reklamante nga buot lang magpailang si “Lee” nga nagbase diha sa Banilad ning siyudad sa Sugbu personal nga mibisita sa ilang buhatan sa miaging semana aron sa pagpangayo og tabang aron madakpan ang mga suspek human masayring naa sila magbase karon sa maong planta.

Sumala pa ni Villordon nga nakautang og minilyon ang mga suspetsado sa reklamanteng si Lee may labot sa ilang mga kontrata kaniadto.

Ang mga tigbalita misuway unta pagkuha og pamahayag kang Lee apan nagdumili kini paghatag og higayon ug mipasabot nga alang kini sa iyang seguridad.

Ang duha ka mga abogado sa mga dinakpan nga maoy nagrepresentar kanila nagdumili paghatag og pamahayag sa mga sakop sa media dihang gipangutana kalabot sa maong alegasyon, nagdumili usab sila bisan pagpaila sa ilang mga pangalan.

Hinuon ang mga tigbalita nakakuha og impormasyon nga mopiyansa ang pito ka Koreano ngadto sa korte. – BANAT NEWS