Bus, minibus manglayas na sa South Terminal

CEBU, Philippines - Gipaabot nga manglayas na ang mga bus ug mini bus operators ug dili na mosulod diha sa Cebu South Bus Terminal karung mosunod nga mga adlaw agi og protesta sa gihulagway nila kaniadto pa nga dili maayong polisiya ug pagdumala sa Kapitolyo.

Kini human gipadayag sa Presidente sa Cebu South Mini Bus Operators Association Julito Flores nga karong sunod bulan gipaabot nga mahuman na ang katukoran sa bag-o nilang terminal nga mahimutang diha sa Mambaling Access Road sa South Road Properties (SRP).

Matud ni Flores nga pagkakaron nagpadayon ang konstruksiyon sa maong terminal nga ilang gi-abangan ngadto sa pamilyang Go nga maoy nanag-iya sa luna nga gihimong terminal.

 Sumala pang Flores nagkasinabot silang mga mini bus operators sa habagatang bahin sa Sugbo nga mamalhin na sila sa mao unyang bag-ong terminal ug dili na sila mosulod sa South Bus Terminal.

Gihulagway ni Flores nga gilisud-lisod sila karon tungod sa mga polisiya ni Gob. Gwendolyn Garcia nga alang nila naka-apiki sa ilang operasyon. Usa na niini ang pagpataas sa bayranan sa parking fees sa matag sakyanan ug ang mubo lang nga oras sa pagpaabot og pasahero maong maobligar sila pagpalarga bisan og dili pa mapuno sa pasahero.

Dugang ni Flores nga gawas nilang mga mini bus operators duna say mga bus operators ang nakig-alayon kanila ug mipadayag na usab og kaandam nga mobalhin na unya diha sa maong bag-ong terminal sunod bulan.

Hinuon ang mga polisiya sa maong bag-ong terminal ang padayon pang tukion sa maong asosasyon uban usab sa mga opisyal sa dakbayan sa Sugbo. – BANAT NEWS