Babaye moambak unta sa tulay

CEBU, Philippines - Naluwas sa mga motorista ug sa mga sakop sa Special Weapons and Tactics sa kapolisan sa dakbayan sa Lapulapu ang usa ka 20-anyos nga babayeng buot moambak sa Mactan-Mandaue Bridge sa milabay’ng gabii.

Ang buot magpakamatay mao si Fe (ngan gipugngan) 20-anyos, dalaga ug kasamtangang nagpuyo sa sitio Sudlon sa barangay Maguikay dakbayan sa Mandaue usa ka tindera sa usa ka tindahan sa dakbayan sa Lapulapu.

Matud pa ni Insp. Joeson Parallag sa SWAT nga atol sa ilang pagresponde, si Fe gipugngan na sa mga motorista nga nanglabay sa taas nga bahin sa tulay gumikan kay buot kining molayat sa maong taytayan nga nagsige og hilak ug singgit.

Gumikan niini ilang gidala sa buhatan sa kapolisan si Fe ug sa Women and Children’s Desk padayon kining gahilak ug dili mokooperar sa mga pulis.

Apan dangtan pipila ka oras nasayran sa kapolisan nga mabdos kini og usa ka bulan ug gumikan kay wala na mopauli ang iyang ka live-in sulod sa duha ka adlaw maong buot siyang maghunos sa iyang kinabuhi pinaagi sa pag-ambak sa maong taytayan.

Ang kapuyo ni Fe residente sa Daanbantayan ug temporaryong nagpuyo sa sitio Sudlon sa Maguikay dakbayan sa Mandaue.

Matud pa ni SPO3 Editha Patalinjug si Fe kasamtangan una nila gipahimutang sa Department of Social Welfare and Development aron matambagan ug maatiman samtang padayon ang ilang pakig-alayon sa pamilya niini. – BANAT NEWS