PRO-7 may teyoriya na sa Ting ambush-slay

CEBU, Philippines - Human masikop ang killer ni Manuel Ting ug napasakaag kaso sa miaging adlaw, ang kapolisan aduna nay teyoriya gisubay nga magkonektar sa nailhan na nilang mastermind.

Si Chief Supt. Lani-O Nerez, director sa Police Regional Office-7 mitug-an sa mga tigbalita nga duna na silay gisusi personalidad nga gituohan nilang maoy mastermind ug maoy nagsugo kang Ruel Velez.

Si Velez napasakaan na og kasong murder sa piskaliya sa miaging adlaw human siya nadakpan niadtong Lunes ug positibong giila sa mga nakasaksi sa krimen niadtong Hunyo 22 diha sa Tisa, siyudad sa Sugbu.

Hinuon giklaro ni Nerez nga bisan tuod og duna na sila’y gitumbok nga mastermind apan dili pa nila mahimong ibulgar sa publiko sanglit naglisod pa sila sa pag-link niini sa suspetsadong si Velez.

Matud ni Nerez nga padayon silang nanghipos og dugang ebidensya, apan nangangkong nagkatin-aw na ang dagan sa ilang kaso labot sa maong kremin.

Giangkon hinuon niyang lisod ang kaso ni Manuel Ting kun itandi sa kaso sa manghod niining gibanhigan usab nga si Nicolas Ting sanglit mikooperar og maayo ang middleman ug natumbok dayon ang mastermind nga pag-umangkon ra sa biktima nga si Larry Ting ingon man ang duha ka gunmen.

Matud pang Nerez dili mokooperar si Velez. Si Velez kusganong mihimakak sa maong mga pasangil maong mitahan sa iyang kaugalingon aron paglimpyo sa iyang pangalan.

Nagtuo hinuon ang opisyal nga posibleng susama ang motibo kang Manuel sa iyang igsuon nga si Nicolas nga may kalambigitan gihapon sa kwarta.

 “Lahi ang ka Nicolas kay naay person naka-link dayon, ang kang Manuel padayon pa ‘ta nangita og lig-ong ebidensya paglambigit aning ato gituohan nga mastermind. Lisod magtumo-tumo lang ta og estorya basin ini’g abot sa korte dili na unya mao,” matud pang Nerez. – BANAT NEWS