Killer sa negosyante wa na diri

CEBU, Philippines - Ang suspetsadong mitulis ug mipatay sa tag-iya sa internet café diha sa barangay Lagtang, dakbayan sa Talisay giingong nakagawas na sa Sugbo base sa nahipos nga report sa kapolisan.

Ang hepe sa Talisay City Police Station nga si Supt. Henry Biñas mibutyag nga duna silay nadawat nga report nga si Junrey Saloricman suspetsado sa pagtulis ug pagpatay kang Jermain Cerna nakagawas na sa Sugbo.

Si Biñas mibutyag nga si Saloricman suspek usab sa pagpanulis og taxi ug pagpanglungkab og internet café ug karon nagduda usab nga dili tinuod nga pangalan ang gigamit ug plano na niining tulison ang kanhi agalong si Cerna.

Si Cerna kinsa maoy tag-iya sa FTL internet cafe napalgang nabulit og samad dinunggaban niadtong Lunes diha sa sulod sa iyang internet café ug wala nay kinabuhi. – BANAT NEWS