Mi-'agaw armas' nadakpan na

CEBU, Philippines - Nadakpan sa Talisay City detention cell ang duha ka lalaki kinsa giingong mihapak og bato ug miilog sa shotgun sa usa ka gwardiya diha sa Hacienda Ferenzi, barangay Maghaway, dakbayan sa Talisay niadtong Lunes sa kaadlawon.

Ang nadakpan niadtong Miyerkules sa gabii mao sila si Jayvee Acedo, 23, temporaryong nagpuyo diha sa Hacienda Ferenzi ug Jeneboy Kuntad, 26, temporaryo usab nga nagpuyo sa nahisgutang lugar.

Ang biktima mao si Fador Venerando, 21-anyos, taga barangay Lahug, dakbayan sa Sugbo usa ka gwardiya kinsa nadestino sa pagbantay sa usa sa mga residente sa maong dapit.

Base sa imbestigasyon sa kapolisan nga si Venerando kalit lang gihapak og bato sa walang bahin sa iyang nawong ug nakuyapan dihang nakaplagan kini wala na diha ang iyang service firearm nga 12-gauge shot gun.

Si Venerando kinsa nakaangkon og grabeng bun-og sa tuong nawong daling gidala ngadto sa Talisay City District Hospital apan gibalhin kini ngadto sa Vicente Sotto Memorial Medical Center.

Si PO3 Arnold Damasco ug PO2 Leandro Azarcon mipahigayon og follow-up operation sa maong insidente ug nabawi kang Acedo ang nahisgutang shotgun.

Si Azarcon nga nahinabi sa Banat News mibutyag nga si Kuntad mitudlo kang Acedo nga maoy mihapak kang Venerando ug mao say mikuha sa shotgun sa biktima.

Apan matud ni Azarcon nga sa ilang imbestigasyon si Kuntad maoy utok sa maong hitabo ug mao kini misugo kang Acedo nga hapakon og bato ang biktima ug kuhaon ang shotgun niini aron mapapatay o ba kaha mapahawa sa iyang pagkagwardiya tungod kay si Kuntad buot nga mopuling gwardiya sa balay nga gibantayan sa biktima.

Si Azarcon midugang nga “agaw armas” ang ilahang gitutokang motibo sa hitabo ug gisusi usab nila karon ang mga background sa duha ka suspetsado. – BANAT NEWS