Sanchez mokiha kang Garcia

CEBU, Philippines - Mibahad si Bise Gob. Gregorio Sanchez pagpasaka og kasong mandamus ngadto sa korte batok kang Gob. Gwendolyn Garcia tungod sa gipagawas niining kamanduan nga ang Legislative Assistance Fund (LAP) dili na magkinahanglan og resolusyon sa Hunta Probinsiyal. Matud pa ni Sanchez nga iyang patun-an sa iyang mga abogado ang pagduso sa maong kaso batok sa gobernadora aron maklaro sa korte kun ang gobernadora ba ang may dakong gahum pag-release sa pundo sa LAP. Apan nitumbok si Sanchez nga moadto una siya sa Commission on Audit (COA) ug Department of Interior and Local Government (DILG) pagkuha og opisyal nga opinyon sa maong isyu sa dili pa modangop sa korte. Giinsister ni Sanchez nga sa Annual Budget Ordinance sa lalawigan, ang LAP ubos sa Office of the Vice Governor ug gawas sa pagkontrolar sa gobernadora. Nagtuo si Sanchez nga gihimo sa gobernadora ang shortcut nga paagi ug milikay sa naandang proseso tungod kay mayoriya sa mga sakop sa hunta probinsiyal ubos man sa One Cebu Party. Nagtuo si Sanchez nga mipahaba ngadto sa gobernadora ang mga bokal nga maglisod sila pagpagawas sa ilang P5 milyones nga gahin matag tuig sa kahadlok nga dili niya pirmahan. (Chester Abadilla) Traysikol vs multicab 1 patay, 6 angol Usa ang patay samtang unom ang angol sa dinasmagay tali sa traysikol ug multicab van didto sa barangay Sangat, lungsod sa San Fernando kagahapon sa buntag. Wala na makaabot nga buhi sa South General Hospital si Rodelio Suarez, 50, nga taga Sangat ug drayber sa traysikol. Samtang ang mga naangol niyang mga pasahero pulos mga menor de edad nga sila si Renier Lucion, Trecy Ecija, Jumayma Enad, Regine Toreza ug Mel Rusty Regis.  Si Fermin Lazarte, 27, nga taga Can-asohan, dakbayan sa Carcar nga maoy drayber sa multicab van naangol usab. Si PO1 Lauro Laurel sa San Fernando Police Station mibutyag sa Banat News nga si Lazarte nagpaingon sa Carcar gikan sa Minglanilla ug kasugat usab sa pikas lane niini si Suarez, dihang pag-abot sa nahisgutang lugar giingong mikawat sa pikas lane si Lazarte hinungdan nga nabanggaan niini ang kasugat nga traysikol nga gimaneho ni Suarez. Gumikan sa kakusog sa impact natuwad ang traysikol ug napiit si Suarez hinungdang miliki ang iyang ulo ug nangabali ang kabukogan nga maoy hinungdan sa hinanali niyang kamatayon. Si Lazarte mitahan sa iyang kaugalingon ngadto sa kapolisan sa Carcar apan giturn-over usab kini ngadto sa kapolisan sa San Fernando.