Pasahero giunay'g tulis sa driver

CEBU, Philippines - Nasakiyo sa usa ka wala hiilhing drayber sa traysikol ang P3,000 nga balor sa salapi ug cell phone sa usa ka ulitawong pasahero kinsa gitulis sa nahauna didto sa barangay Agus, dakbayan sa Lapulapu sa miaging gabii. Ang biktima mao si Nico Romualdez, 21, ulitawo, nga taga Paseo Francisco, Whitesand Resort sa barangay Agus sa nahisgotang dakbayan. Ang biktima nagtibi nga misumbong   sa mga tinugyanan sa Theft and Robbery Section sa kapolisan sa maong dakbayan nga gikan siya sa Poblacion sa maong dakbayan   luwan sa traysikol nga gimaneho sa wala pa hiilhing drayber paingon ngadto sa Agus. Apan pag-abot nila sa awaaw nga bahin sa Agus kalit lang gipahunong sa drayber ang gimaneho niining traysikol ug nanaug unya nagpakaaron-ingnon nga adunay giayo sa sakyanan. Midugang ang biktima nga nakurat nalang siya dihang pipila ka gutlo ang nakalabay, miduol ang drayber kaniya ug kalit siyang gitionan og kutsilyo ug mipahibawong tulis. Ang biktima kinsa nabalaka nga patyon siya, mihatag nalang sa iyang cell phone ug salapi nga ang tanan mikabat sa P3,000 ang kantidad ngadto sa tulisan. Si PO2 Kent Lisen sa kapolisan sa Lapulapu miingon nga kasamtangan nilang gipanid-an karon ang maong tulisan.