Gikulata dayon giluba naangol

CEBU, Philippines - Samdan sa bukobuko ang usa ka ulitawo dihang gidunggab kini human kulataha sa iyang mga silingan didto sa sitio Seaside, barangay Pajo, dakbayan sa Lapulapu sa miaging gabii. Ang biktima mao si Dendie Pescalia, 28, ulitawo, nga taga Seaside, samtang ang mga suspetsado mao sila si Rogelio Projenio, 24, ug Jacel Pitogo, hingkod nga pulos silingan sa biktima. Si PO2 Kent Lisen sa kapolisan sa Lapulapu mibutyag sa Banat News nga naglakaw sa karsada ang biktima pauli na sa ilang balay dihang giatangan kini sa mga suspetsado. Una dunggaba sa bukobuko, nakig-estorya pa sa makadiyot kaniya ang mga suspetsado dayon gitabangan siya og kulata hangtod nga usa kanila maoy milanit og kutsilyo nga giluba sa bukobuko ang biktima. Gihatod dayon ngadto sa Lapulapu District Hospital ang biktima samtang dali kaayong nakasibat ang mga suspetsado nga mao karoy gipangita sa kapolisan.