Mayor-elect sa Compostela mikanaog na; supporter gisukmag

CEBU, Philippines - Mikanaog na sa munisipyo si Compostela Mayor-elect Joel Quiño kagahapon sa buntag aron pagtuman sa mando sa Commission on Election-Manila.

Kini human gipahimangnuan sa DILG-7 regional director ug caretaker mayor Pedro Noval nga mahimong ma-contempt si Quiño tungod sa pagdumili pag-ila sa kamanduan sa DILG-Manila nga nagtudlo kaniya isip caretaker mayor sa lungsod samtang wala pay natudlo ang Comelec-Manila kinsa ang lehitimong opisyales sa lungsod.

Si Quiño nga unang mitumbok nga andam magpa-contempt ug magpabilanggo kay maulaw siyang tulisokon sa katawhan nga wala maghimo sa iyang katungdanan isip mayor sa Compostela mipahibalo sa Kapitolyo nga mokanaug kini isip mayor ug miila sa gitudlong caretaker mayor nga si Noval. Samtang si Gob. Gwendolyn Garcia mitumbok nga nalipay siya sa gihimo ni Quiño tungod kay dili na madisturbo ang kahapsay ug kalinaw sa lungsod sanglit naklaro man nga si Noval na ang temporaryong modumala sa lungsod. Sa susamang kalambuan, ang supporter ni Quiño nga ig-agaw sa kapitan sa barangay Cabadiangan nasumbagan atol sa pag-ulbo sa kagubot tali sa mga supporters ni Quiño ug kanhi Mayor Ritchie Wagas.Nagpa-blotter sa kapolisan si Noel Paradiang human naigo ang iyang apapangig sa kalit nga pagsukmag sa wala mailhing tawo nga gituohang supporter ni Wagas samtang nakig-inom sa mga kauban ug naminaw sa prayer rally sa kampo ni Quiño. Human sa panukmag, mitumaw ang grabeng tensyon tali sa mga supporters sa duha ka habig apan wala usab magdugay nahilot sa kapolisan ug kasundalohan ang tensiyon. Si Rachel Wagas-Cañada, igsuon ni Mayor Wagas ug kapitan sa Poblacion mihangyo kang Cebu Provincial Police director Sr. Supt. Erson Digal pagpahunong sa prayer rally sa kampo ni Quiño. Gihulagway niya kini nga usa ka political rally kay giatake naman ang iyang igsuon kanhi mayor ug ingon man ang mga supporters. Kagahapon, si Digal mibalik usab sa Compostela aron pagbungkag sa tent nga gibutang sa kilid sa munisipyo nga gipundukan sa mga supporters ni Wagas.