Kahimtang sa sakyanan ug dalan susihon

CEBU, Philippines - Ang kahimtang sa sakyanan ug ang kahimtang sa kadalanan dinhi sa Sugbo maoy nag-unang hinungdan sa mga aksidente sa sakyanan nga mokalas og kinabuhi sa mga magluwan niini.

Kini ang gipadayag ni Nick Villahermosa nga kanhi presidente sa Cebu Provincial Bus Operators Association (CPBOA) isip iyang reaksiyon sa mga nagsunodsunod nga aksidente sa mga sakyanan dinhi sa lalawigan.

Matud pa niya nga ang maintainance sa sakyanan sama sa pagsuta sa mga preno ug uban pang dapat sama sa ligid, manobela ug uban pa, sa dili pa mobiyahe mahinungdanon kaayo.

Apan gawas sa kondisyon sa sakyanan gitataw usab niya nga ang kahimtang sa kadalanan dinhi sa Sugbo nga may dulhogon ug tungason nga magsinanggot ang likoon sa kilid sa kabukiran , usa usab sa nag-unang hinungdan sa aksidente.

Matud pa niya nga kinahanglan kaayo nga masiguro ang kaluwas sa kondisyon sa sakyanan sa dili pa mobiyahe ug dinhi gikinahanglan kaayo ang sakripisyo sa mga tag-iya sa pagbutang og tawong piyado alang ning maong gimbuhaton sa dili pa molarga ang sakyanan.

Kini aron sa pagsiguro nga luwas ang kinabuhi sa mga pasahero niini.

Apan midugang si Villahermosa nga dili lamang kondisyon sa sakyanan ang angayang sutaong luwas, kay ang kondisyon sa drayber kinahanglan usab nga masuta kun dili ba hubog sa alak, hubog sa illegal nga drugas ug uban pa.

Si Villahermosa miingon nga ang Motor Vehicle Inspection department sa Land Transportation Office (LTO) 7 kinahanglang mohimo usab og lakang sa pagsuway sa mga sakyanan sa panahon sa ilang pagpa-renew sa rehistro niini kausa sa matag tuig.

Ang maong pamahayag ni Villahermosa gihimo human sa nagsunodsunod nga mga panghitabo nga nalambigit sa mga sakyanang pasaheroan diin mikapin sa 50 ka tawo ang nakalas ug sobra pa niini ang naangol sa miaging semana.(Romeo T. Limpangog)

Eskuylahan tukoron sa mayor sa Mandaue ug Lapulapu Ang pagtukod og kaugalingong edipisyo sa tulunghaan alang sa mga tinun-an sa kolehiyo  sa dakbayan sa Lapulapu ug Mandaue maoy mga prioridad sa mga mayor sa maong mga dakbayan.

 Si Mayor Paz Radaza sa Lapulapu mibutyag sa Banat News nga gisuportahan niya pag-ayo ang bag-ong gitukod nga Lapulapu City College (LCC) ug gani gisugdan na kini og gamit niining unang semester sa mga estudyante.

 Matud pa ni Radaza nga mokabat sa 370 ka mga tinun-an ang nagpa-enrol sa nagkalainlaing kurso nga maoy nakasubo niining bag-ong kolehiyo sa dakbayan.

Matud pa ni Radaza nga malagmit modaghan ang mga tinun-an sa umaabot nga katuigan hinungdan nga naglaraw siya nga padugangan pa og tukod og dugang mga building ang nahisgutang eskuylahan. Giplano usab sa mayor sa Lapulapu ang pagtukod sa Lapulapu Sports Center sa ubos nga bahin sa unang taytayan sa Mactan -Mandaue Bridge.

 Sa laing bahin susama usab niini ang laraw ni Mandaue City Mayor Jonas Cortes alang sa Mandaue City College (MCC) nga karong tuiga mas midaghan ang populasyon sa ilang mga tinun-an.

 Usa sa problema nga nasinati sa mga tinun-an mao ang pagbalhin -balhin sa mga edipisyo nga lagyo kaayo og distansiya.

 Gumikan niini si Mayor Cortes isip iyang prioridad ang paglambo sa edukasyon ilabi na sa mga tinun-an nga kabus gusto niyang hatagan og kaharuhay ang pagtuon sa maong mga estudyante.

Naglaraw siya nga magtukod og usa ka permanenteng edipisyo sa MCC diha sa barangay Looc sa maong dakbayan.

 Apan taas pa kining maong proseso gumikan kay makig-atubang pa siya sa National Housing Authority o NHA nga maoy ahensiya nga mosil-ing sa lugar nga tarokan niini.

 Paninguhaon ni Mayor Cortes nga kini makabaton dayon og katumanan sa dili pa mahuman ang iyang termino sa pagserbisyo sa katawhan sa dakbayan.

Gipahibalo usab ni Mayor Cortes nga gihatag na nila ang mga panginahanglan nga gipangayo sa CHED 7 alang sa akreditasyon sa mga kurso nga ilang gitanyag sa MCC..(BANATNEWS)