Nadughan pagkaigo sa bala

CEBU, Philippines - Samdan sa dughan ang usa ka ulitawo human kini pusila sa wala hiilhing kriminal nga nagsakay og motorsiklo didto sa dalan FF Cruz, North reclamation area sa dakbayan sa Mandaue sa miaging hapon.

Si PO3 Dionesio dela Pena sa homicide section sa kapolisan sa Mandaue miila sa biktima nga si Jonathan Garay, 33, ulitawo nga taga Canduman Housing sa barangay Canduman sa maong dakbayan.

Nasayran sa kapolisan nga naglakaw nga nag-inusara sa dalan FF Cruz ang biktima dihang miabot ang motorsiklo nga gisakyan og duha ka tawo unya ang backrider niini maoy miluthang sa biktima.

Tungod sa iyang samad sa ibabaw’ng bahin sa dughan, gihatod dayon ang biktima ngadto sa Vicente Sotto Memorial Medical Center sa dakbayan sa Sugbo samtang gipangita pa sa kapolisan ang kriminal.   – BANAT NEWS