LRT, BRT mahimong magdungan-Ediegul

CEBU, Philippines - Si Kongresista Eduardo Gullas nagkanayon nga ang nasinating problema sa mga bus karon nga nangadisgrasya tungod sa pagkawagtang sa preno posibleng masinati sa mga bus nga gamiton sa Bus Rapid Transit (BRT).

Ang kongresista sa unang distrito nagkanayon sa dihang nahinabi sa Banat News nga dili layo ang posibilidad nga aduna gihapoy disgrasya nga mahitabo sa BRT.

Ikaduhang nakita ni Gullas nga suliran kun ipatuman ang BRT mao ang kahagip-ot sa mga karsada, ilabi na sa dakbayan sa Sugbo nga dili na maagian og mga dagkong bus.

Matud niya nga ang BRT nagkinahanglan og dakong karsada nga kaagian sa bus, apan sa siyudad sa Sugbo, ilabi na sa Fuente Osmeña area ngadto sa Provincial Capitol, hilabihan kahagip-ot sa karsada.

Tungod niini, si Gullas nagkanayon nga mahimo ang BRT sa mga dagkong karsada samtang ang Light Rail Transport (LRT) sa mga gagmay og karsada. Ang LRT adunay espesyal nga agianan sa ibabaw.

“So the BRT and LRT can compliment with each other. Kay duna man gyud tay gagmay nga karsada,” si Gullas sa dihang nahinabi pinaagi sa telepono.

Sa nahitabong sunodsunod nga aksidente sa mga bus nga mikalas og daghang kinabuhi, si Gullas mipadayag usab nga kinahanglan nang susihon ang rules and regulation ug franchising sa mga bus kun nasubay pa kini sa balaod.

 Matud sa kongresista nga ang mga tag-iya sa mga bus nagkinahanglan usab nga mohashas og maayo sa mga drayber nga ilang pilion nga momaneho sa ilang mga sakyanang de pasaheroan.

Si Gullas nagkanayon usab nga awhagon niya ang Committee on Transportation sa House of the Representatives nga tan-awon ang mga rekisitos sa mga bus.

Midugang ang kongresista nga ang mga nahitabong aksidente sa mga bus angayan nga hatagan og pagtagad sa Committee on Transportation.

Sa laing bahin, ang hepe sa Talisay City Police Station nga si Supt. Henry Biñas mimando kagahapon sa hepe sa Traffic Division sa siyudad nga si SPO4 Henry Obiso pagsusi sa mga prangkisa sa mga sakyanang de pasaheroan, usa na niini ang V-hire nga moagi sa barangay Manipis, dakbayan sa Talisay kun wala ba kini mo-shortcut sa ilang rota.

Ang mga V-hire ug uban pang mga sakyanan nga pasaheroan kasagaran nga moagi diha sa nahisgutang lugar daghang mga pasahero ang sakay.

Ang karsada diha sa nahisgutang barangay delikado kaayong agian tungod sa katitip niini ug kuyaw pa sa dahili sa yuta. Gipasabot ni Biñas nga dili sila makapugong ni bisan kinsa nga moagi sa Manipis tungod kay gibuksan man kini alang sa publiko. Gihinaot lang niya ang pagmabinantayon. – BANAT NEWS