Bus operators kinahanglang mopasusi sa ilang bus

CEBU, Philippines - Nanawagan si Gob. Gwendolyn Garcia ngadto sa tanang mga bus operators dinhi sa Sugbu nga ipa- inspection ang tanan nilang mga bus sa dili pa kini tugutan nga molarga aron malikayan ang disgrasya.

Matud pa ni Garcia nga tungod sa nahitabong pagkabangga sa Corominas Bus nga iya sa V&JA sa barangay Lutopan sa dakbayan sa Toledo mopatawag unya siya og tigom sa mga bus operators dinhi sa lalawigan.

Kini aron personal silang awhagong ipaubos gyud kanunay sa road worthiness test ang ilang mga sakyanan kini aron usab maprotihian ang ilang mga negosyo pinaagi sa paglikay sa disgrasya.

Ang gobernadora nagkanayon nga mabasol gyud sa mga disgrasya ang mga operators ilabi na niadtong magdaginot sa pagasto alang sa maintenance sa ilang mga sakyanan.

Iya usab nga awhagon ang mga operators nga disiplinahon ang ilang mga drayber ug mga konduktor nga mosubay gyud sa patakaran sa trapiko.

Samtang gipahibawo sa gobernadora nga ang provincial welfare officer gitahasan na sa paghatag financial og mga bugas ug ubang gikinahanglanon sa mga pamilya sa nabiktima.

Gipahibalo ni Garcia nga ang Kapitolyo mopagawas og kwartang hinabang alang sa mga nabiktima sa duha ka aksidente sa Toledo nga mikalas og mga kinabuhi, kini ang mga biktima sa Lutopan ug sa Poog.  – BANAT NEWS