Pagka-'caretaker' ni Noval ilegal - Quiño

CEBU, Philippines - Gihulagway sa wala makalingkod nga si Compostela Mayor Joel Quiñonga ilegal ang paglingkod ni Department of Interior and Local Government regional director Pedro Noval Jr. isip caretaker sa lungsod.

Si Quiño kinsa miokupar og lawak isip iyang buhatan diha sa legislative building sa Compostela mitug-an sa mga tigbalita kagahapon nga siya lamang maoy gipasabot sa kanselasyon sa proklamasyon diha sa kamandoan sa Comelec 2nd Division.

Matud pa niya mahimong makalingkod isip acting mayor ang iyang nakadaog nga bise mayor nga si Dr. Neneth Dangoy samtang gipaabot pang matuki sa korte karong Hulyo 9 ang ilang motion for reconsideration nga ilang gisang-at niadtong Hulyo 2.

Si Quiño midugang nga andam siyang magpapriso kung maoy dangatan sa iyang paglingkod diha sa munisipyo supak sa kamandoan sa korte ug sa DILG kaysa makit-an siya sa iyang mga konstituwente nga wala molihok.

Apan si Noval sa iyang bahin, mibutyag sa mga tigbalita mahimong ma-contempt of court si Quiño ug mipasabot nga wala siya’y interes sa maong pwesto ug misunod lang siya sa kamandoan sa iyang mga labaw base usab sa balaod.

Kagahapon gipakigkitaan ni Noval ang tanang department heads sa munisipyo aron masuta ang mga gikinahanglang buhaton ug mga kakulang sa ilang mga buhatan.

Matud pang Noval nga dili siya gustong maapektahan ang basic services sa mga taga Compostela gumikan lamang niining panagsungi sa duha ka mga mayor.

Sa gipadalang pamahayag ni Quiño sa igsuong pamantalaan nga The Freeman mipasabot nga ang mosyon ilang gisang-at agi og tubag sa gipadalang kamandoan sa 2nd Division nga pinirmahan ni Commissioner Nicodemo Ferrer nga nagsuspenso sa proklamasyon nilang mga nakadaog nga opisyal.

Ang kamandoan maoy resulta sa gisang-at nga election protest ni Mayor Ritchie Wagas nga nagkwestyon sa resulta sa counting sa mga botos ginamit ang Precinct Count Optical Scan (PCOS) machines ug miawhag og manual recount sa mga botos.

Giawhag ni Quiño si Noval ug ang publiko nga pasagdan nalang nga molihok ang proseso pinasubay sa legal nga paagi.

Si Noval sa report kagahapon sa DyAB, mibutyag nga isip maoy tagdumala sa tanang local government units sa tibuok rehiyon subay sa 1987 Constitution ug Local Government Code of 1991 gitahasan siya sa ilang labaw’ng buhatan nga maoy molingkod isip “caretaker” sa lungsod sa Compostela.

Samtang si Sr. Supt. Erson Digal sa Cebu Provincial Police Office mibutyag nga ipabilin niini ang augmentation force sa maong lungsod ug mag-agad lang sila sa kamandoan ni Noval.  - Rey Pasaporte, Lesley Caminade ug Edwin Ian Melecio ( BANAT NEWS)