Kandila miugdaw sa balay

CEBU, Philippines - Tungod sa kandila, naugdaw ang usa ka panimalay samtang laing balay nakan-an sa ikaduhang andana lang.

Ang sunog nahitabo sa sitio San Antonio De Padua, barangay Inayawan pasado alas 11 kagahapon sa buntag.

Ang panimalay nga naugdaw gipanag-iya ni Estella Dy, 66, samtang ang partially-damaged nga panimalay gipanag-iya sa iyang anak nga si Voltaire.

Sa pakighinabi ni SFO2 Roelyn Maratas, imbestigador sa Bureau of Fire Protection (BFP) mibutyag nga ilang nadawat ang alarma alas 11:50 sa buntag samtang giisa kini ngadto sa second alarm alas 11: 54.

Matud pa ni SFO2 Maratas nga base sa gibutyag ni Dy sa dihang iyang nahinabi mitug-an nga aduna siyay gibilin nga kandila sulod sa iyang kuwarto nga iyang gidagkotan ug gibutang sa altar aron mag-ampo. Apan sa dihang iya kining giugbok sa usa ka kahoy sa ilang altar, iya kining nabiyaan og kadiyot tungod kay migawas siya apan mao nalay iyang nakita pagbalik nga nagsiga na ang iyang altar.

Tungod niini, daling migawas si Dy sa ilang panimalay ug nangayo og pakitabang, apan wala kini matabang.

Midugang si SFO2 Maratas nga naapil ang 2nd floor sa panimalay sa anak ni Dy nga anaa lang sa tapad niini.

Gihulagway usab ni Maratas nga sulod sa usa ka compound ang mga balay nga nasunog nga ginama sa mga konkreto ug kahoy.

Nakontrolar ang sunog sulod sa 10 minutos samtang gibanabanang mokabat og P250 mil ang danyos sa sunog.

Naproblema ang kabomberohan sa agianan, apan nakalusot hinuon ang mga hose sa tubig human ang Sto. Niño Fire Brigade mitabang sa pagpalong sa kalayo.  – BANAT NEWS