Gangster sa Lapu gipatay

CEBU, Philippines - Patay ang usa ka lalaki human kini pusila sa miaging kaadlawon diha sa Basak Mercado, barangay Basak, dakbayan sa Lapulapu.

Ang namatay mao si Warren Ochea, 27, giingong miyembro og gang ug construction worker nga molupyo sa nahisgutang dapit samtang padayon pa ang kapolisan pagtumbok si kinsa ang wala mailhing grupo sa mga lalaki nga nagsakay og motorsiklo nga mipusil sa biktima.

Sa imbestigasyon ni SPO3 Rex Ybañez sa Homicide Section sa kapolisan sa maong dakbayan nakig-inom ang biktima sa iyang mga higala diha sulod sa ilang balay.

Human sa pipila ka botelyang nahurot mibalhin sila sa usa ka KTV bar sa nahisgutan gihapong lugar ug gipadayon ang ilang panag-inom.

Matud pa ni Ybañez nga nananghid ang biktima nga mogawas kay mopalit og sigarilyo sa usa ka tindahan apan samtang naglakaw kalit mibutho ang mga gikatahapan ug sa walay igong hinungdan kalit nga gipusil si Ochea.

Ang mga mamumuno daling miikyas luwan sa motorsiklo ug wala na makit-i pa sa kapolisan apan gituuhang mga sakop usab sila og gang nga kaaway sa grupo sa biktima.

Ang biktima nakabaton og upat ka mga samad pinusilan sa iyang bukobuko ug daling gidala sa Mactan Doctors Hospital apan gideklarar nga dead on arrival.  – BANAT NEWS