CEBU, Philippines - Usa ka inahan nakatawag sa atensiyon sa mga tawo diha sa punerarya tungod kay mikulisiw kini og hilak dihang nakita ang usa ka patay’ng lawas sa babaye nga naapil sa nahitabong disgrasya sa Corominas bus niadtong Sabado sa gabii diha sa barangay Lutopan, dakbayan sa Toledo.
Kahinumduman nga 15 ka tawo ang namatay sa maong hitabo ug ang tanang patay’ng lawas gidala diha sa Saint Francis Funeral Homes sa barangay Poblacion sa nahisgutang siyudad.
Si Pilar Liptos, 39, taga barangay Owak, lungsod sa Asturias naghilak pag-abot diha sa nahisgutang punerarya ug dihang gipakita kaniya ang usa ka patay’ng lawas sa babaye mikulisiw kini tungod kay nagtuo siya nga iya kadtong anak.
Apan sa dihang gipausab og tan-aw kaniya sa mga polis ang maong patay pagkompirmar kun iya ba gyud kadtong anak nangluspad na kini ug nabantayan nga gibati siya og kahadlok nga nagkanayon “dili diay na mao, pareha man gud og blouse sa akong anak ang iyang gisul-ob nga akong gipalit.”
Si Liptos mibutyag sa mga tigbalita nga ang iyang anak sa pagka-dalaga nga si Analyn Maglente, 18, matag buwan lang kini mopauli ngadto sa Asturias tungod kay nagtrabaho kini diha sa Norkis Motor Center dakbayan sa Carcar.
Sa milabay’ng mga adlaw nananghid kini kaniya nga mouban sa iyang mga higala ngadto sa lungsod sa Barili apan wala niya tugoti.
Matud ni Liptos nga niadtong Mayo 8, 2010 ang kataposan nilang panagkita sa iyang anak ug karong Martes Hulyo 6, 2010 birthday niini.
Gibutyag usab ni Liptos nga gibati siya og kabalaka tungod kay dili na motubag sa iyang tawag sa cellphone ang iyang anak hinungdan nga midali siya og anha sa dakbayan sa Toledo deretso ngadto sa district hospital aron mangutanga kun wala ba naapil sa mga pasahero sa Corominas bus nga nadisgrasya ang iyang anak.
Matud niya nga wala sa listahan sa mga naangol ang ngalan sa iyang anak hinungdan nga misusi siya sa punerarya tungod sa pagtuo nga patay na ang iyang anak apan wala usab sa mga nangamatay ang iyang anak.
Apan wala siya masayod kun nakasakay ba sa maong bus nga nadisgrasya ang iyang anak. – BANAT NEWS