Vendors sa downtown area magpabilin apan...

CEBU, Philippines - Gikatakdang makigtagbo si Cebu City Mayor Michael Rama sa mga kahugpungan sa mga street vendors sa downtown area ingon man kang Ermita barangay konsehal Mari Pino-Buanghug aron tukion ang pagluag sa naghuot nga kadalanan gumikan sa mga mamaligyaay.

Si Rama kinsa sa panahon pa sa kampanya misaad nga himuon nindot ang bati ug ayuhon ang gubaon dili buot nga wagtangan og panginabuhian ang mga sidewalk vendors sa downtown area.

Buot ni Rama nga pakigkitaan ang Cebu City United Vendors Association (CCUVA) pinangulohan ni Buanghug aron masulbad kining nagkahuot nga agianan sa mga tawo daplin sa mga kalsada.

Pipila ka mga lumalabay sa Colon area ang maglisod og paspas gumikan sa nagwala-tuong mga estante sa mga sidewalk vendors ug kun panahon sa kagabhion himuon nila kining alad kay mangatulog sila diha sa tunga.

Ang Colon matag gabii maghuot sa mga sakyanan ug mga tawong mamauli sa ilang mga balay ug labaw sa tanan ang mga sidewalk vendors nga magdala og lamesa ug mga kariton nga diriyot maigo na sa mangaging sakyanan.

Aron paninduton ang bati, buot karon ni Rama nga mopailawom og training diha sa Department of Manpower Development and Placement(DMDP) sa City Hall ang mga vendors aron makat-on kun unsaon pagpanindot ang ilang tindahan ug pagpalambo pa sa ilang panginabuhian.

Kahinumduman nga ang City Traffic Office Management mirekomendar sa pagpatangtang sa tanang sidewalk vendors gumikan kay ang mga tawo dili na makaagi sa daplin ug usahay anha na gyud sa tunga tungod kay wala nay kalutsan.  – BANAT NEWS