CEBU, Philippines - Napriso ang usa ka manglabnihay human kini masikop sa mga tanod niadtong Huwebes sa gabii didto sa sitio Kilawan, barangay Tanke, dakbayan sa Talisay.
Ang suspetsado mao si Dexter Macachor, 18, ulitawo, walay trabaho nga taga Tanke.
Ang unang gibiktima ni Macachor mao si Jackelyn Padillo Delos Reyes, 26, nga taga Tanke ug didto kini labnihi sa sitio Kilawan nianang alas 7:00 sa gabii.
Base sa imbestigasyon sa mga polis nasayran nga samtang nagsakay ang biktima og traysikad gikan sa sitio Salvador, Tanke paingon ngadto sa sitio Galaxy sa mao gihapong barangay, kalit lang gilabni sa suspetsado ang iyang silver nga kwentas.
Human niini. midagan ang suspetsado pahilayo sa maong lugar busa ang biktima daling mi-report ngadto sa Talisay City Police Station bahin sa nahitabo kaniya.
Unya wala pa matagbaw, si Macachor giingong nanglabni na usab og pitaka nga iya ni Salvina Abay Comendador, 29, taga Kilawan usab nianang pagka-alas 9:15 sa kagabhion.
Matud pa sa biktima nga nadala sa suspetsado ang mga butang nga gisulod sa iyang pitaka sama sa cell phone, police clearance, voter’s ID, driver’s license, mga hospital bill, Philhealth ID ug kwarta nga nagkantidad og P4,600.
Si Comendador mitug-an ngadto sa mga polis nga nagsakay siya og traysikad dihang gilabni sa suspetsado ang iyang pitaka.
Human og pagpanglabni si Macachor midagan ngadto sa sudlonong bahin sa sitio Kilawan.
Unya si Comendador nangayo og panabang sa iyang mga paryente ug sa mga tanod sa barangay nga sila si Ricardo Padin, Fidel Arnoco ug Marcelino Labajo nga maoy migukod kang Macachor hangtod nga kini nadakpan.
Ang pitaka sa biktima ug ang mga sulod niini gawas sa kuwarta nabawi gikan sa suspetsado ug nagpahayahay na siya karon sa prisohan. (BANATNEWS)