CEBU, Philippines - Usa ka suspetsadong pusher og shabu ang nakaikyas apan nadakpan ang bata-bata niini sa gipahigayong pagpangronda sa mga sakop sa Provincial Anti-Illegal Drugs Special Operation Task Group (PAIDSOT-G) kagahapon sa buntag diha sa barangay Ward I, Poblacion, lungsod sa Minglanilla.
Ang bata-bata giilang si Gerson Onabia Pencirga, 20, residente sa maong dapit kinsa nakuhaan og usa ka kalibre .38 rebolber nga may usa ka buhing bala sa .38 ug bala sa .357 kalibre.
Ang target unta sa mga polis mao si Armando Bacalla nga giingong maoy tigpayuhot og ginadiling drugas diha sa maong dapit.
Armado og search warrant nga giluwatan ni Regional Trial Court (RTC) Judge Edito Enemecio sa Branch 25, dakbayan sa Danao gironda sa kapolisan ang balay ni Bacalla.
Si SPO2 Edgar Causon nga nahinabi sa Banat News mibutyag nganakabantay si Bacalla ug gisugat sila Pencirga nga nagbitbit og armas.
Matud ni Causon nga nalipat sila tungod kay nasentro na ang ilang atensiyon kang Pencirga hinungdan nga nakaikyas si Bacalla.
Gibutyag usab ni Causon nga sa ilang pagsiksik sa balay sa suspetsado duha ka medium nga paketeng shabu ang ilang na-recover diha sa kwarto niini. (BANATNEWS)