15 patay, 48 angol sa bus

CEBU, Philippines - Kinse ka tawo ang kompirmadong patay sa nahitabong laing aksidente nga gikalambigitan sa bus de pasaheroan diha sa barangay Lutopan sa dakbayan sa Toledo kagahapon pasado alas-5 sa hapon.

Si PO3 Julius Sanchez, ang traffic investigator sa Toledo Police Station sa pakighinabi sa Banat News sa telepono mibutyag nga ang Corominas Bus nga may plakang GVG-145 gikan sa dakbayan sa Sugbu nga puno og pasahero padulong sa Tuburan maoy nadasmag.

Ang drayber sa maong bus kinsa mitahan sa kapolisan human sa aksidente giilang si Diosdado Requiso, 48, taga Libo, Asturias ug 12 ka tuig nang drayber ug mekaniko sa mga bus pasaheroan.

Atol ning pagsulat sa balita padayon pang giila ang dose ka dead on the spot nga mga pasahero nga naglangkob sa mga babaye ug lalaki lakip na gituuhang mga bata kansang mga lawas nagkaputol-putol.

Samtang gibana-banang kapin sa 48 ka mga pasahero usab ang nangaangol nga gihatud sa Toledo District Hospital lakip na sa ubang mga tambalanan sa dakbayan sa Sugbu.

Sumala pa sa report sa DySS kagabii, naglakip sa mga nangaangol ug nadangat sa tambalanan mao sila si Flordeliz Benting, Felipe Benting, Neil Benting, Vincent Benting, Cyril Benting, pulos mga taga lungsod sa Tuburan.

Nalandig usab sa tambalanan sila si Juanito Batulan, Roger Molbe, Antonio de Gracia, Betra Dakay, Roger Dakay, Mildred Turay, Rogelio Caro, Geric Romero, Junive Aziz, Garry Docilla ug Edilberto Alferez.

Lakip sa mga nangaangol mao sila si Jovito Permacio, Antonio de Gracia, Joey Endino, Mirasol Sarkita, Erwin Sapatan, Concepcion Omandap, Worly Omandap, Rachelle Ann Sapatan, Rosemarie Sapatan, Fortaliza Rebalde, Berlito Rebalde, Joey Endino ug Jerome Tecson ug duna pay mga wala mailhi.

Matud pa ni Sanchez nga dulhogon ang maong dapit ug sa dayong pagliko sa drayber sa wala nalahos kini sa konkretong paril ug natumba sa iyang tuong kilid hinungdan sa grabeng pagkaguba sa atubangan ug kilid niini lakip na sa atop ug sa bintana.

Dugang pa ni Sanchez base sa pasiunang imbestigasyon nawad-an og brake ang maong bus apan aduna pa silay himuong lawom nga imbestigasyon sa maong hitabo.

Si Requizo sa interbyu sa DySS nagkanayon nga dili kaayo tantong kusog ang dagan sa iyang sakyanan niadtong tungura apan sa dayon niyang liko mitakilid kini og maayo ug dihadiha natumba kini sa tuong kilid.

Si Requizo human sa pagkatumba gitabang sa usa ka drayber sa habal-habal ug gidala sa Lutopan Police Station samtang gipangita pa usab ang konduktor niining si Bimbo Baliguat.

Matud pang Requizo sa maong interbyu nga dunay 53 nga sitting capacity ang iyang bus apan niadtong tungura adunay nagbarog nga mga pasahero. (Edwin Ian Melecio,   ug Wen Celen)   (BANATNEWS)