CEBU, Philippines - Gibati ni Mayor Jonas Cortes ang kasagmuyo dihang gipahibalo sa General Manager sa Cebu Ports Auhtority (CPA) sa tinguha niining pagbalhin sa Cebu International Port (CIP) sa dakbayan sa Mandaue.
Atubangan sa taga media gipasabot ni Cortes nga nahimangod siya kang General Manager Vicente Suazo sa CPA kay mideretso lang kini sa paghimo og pamahayag nga wala gani mopahigayon og konsultasyon.
Apan nabugnaw ra usab ang kasagmuyo sa mayor dihang nangayo og pasaylo si Suazo kaniya.
Matud pa ni Cortes nga supak siya sa maong laraw kay labi kining makapabug-at sa suliran sa trapiko sa dakbayan sa Mandaue.
Kini tungod kay labi mang modaghan ang mga delivery truck ug uban pang mga sakyanan nga modasmag sa puwerto busa labing masinatian ang pagkapiang unya sa dagan sa trapiko sa Mandaue. Giangkon ni Cortes nga bisan kun maayo unta ang tumong sa maong laraw, apan gumikan sa nasuta niyang dili maayong epikto niini sa dagan sa trapiko sa iyang dakbayan, dili gyud siya mosugot niini.
Matud pa ni Cortes nga sa ilang panagsulti ni Suazo kinsa miduaw sa iyang buhatan sa miaging adlaw, iyang giinsister nga ang lungsod sa Consolacion o Liloan maoy haum nga lugar nga angayang balhinan sa CIP aron usab matabangan sa pagpalambo ang maong mga dapit.
Sayo niini gipalanog ni Suazo nga adto nila ibalhin ang CIP sa barangay Looc dakbayan sa Mandaue. – BANAT NEWS