Curfew sa Cordova gihigpitan

CEBU, Philippines - Gipahugtan sa lungsod sa Cordova ang pagpatuman sa curfew sa kabataan diha sa kadalanan agi og proteksyon kanila ug pagpatunhay sa kahapsay ug kalinaw sa maong lungsod.

Unom ka minor de edad sa lungsod sa Cordova ang gihipos sa kapolisan sa higpit nga pagpatuman sa ordinansa sa curfew hour sa tibuok kabarangayan kagahapon sa kaadlawon.

Ang gihipos naglangkob sa upat ka mga babaye ug duha ka mga lalaki ang nadakpan sa kapolisan sa barangay Poblacion sa maong lungsod alas-11 pasado na ang takna sa kagabhion.

Ang Cordova mihimo og Municipal Ordinance 09-2009 aron maoy basehanan sa konseho nga giaprobahan usab ni Mayor Adelino Sitoy alang sa pagpatuman niini gumikan sa mga krimeng gikalambigitan sa kabataan.

Si SPO2 Laurencio Wagwag sa kapolisan sa nahisgutang lungsod nga nahinabi sa Banat News miingon nga ang maong mga batan-on gi-turnover na nila ngadto sa Municipal Social Welfare and Development Office sa maong lungsod kinsa mao nay mopatawag sa mga ginikanan.

Gipasabot niyang walay silot alang sa unang higayon nga paghimo’g kalapasan apan sa ikaduha ngadto sa ikatulo base sa ordinansa adunay ipahamtang nga silot nga naglakip sa pagpahamtang og multa.

Ang mga ginikanan pahimangnoan usab sa social welfare workers sa lungsod bahin sa ordinansa ingon man sa pagpahinumdum sa ilang mga responsibilidad.