Truth Comm. gikalipay apan...

CEBU, Philippines - Gihangop ni Capitol Consultant on Information Atty. Rory Jon Sepulveda ang pag-umol ni Presidente Benigno ‘Noynoy’ Aquino III og ‘Truth Commission’ nga pangulohan ni kanhi Chief Justice Hilario Davide Jr. aron maimbestigar ang mga giingong anomalosong mga proyekto ni kanhi presidente Gloria Macapagal Arroyo.

Matud pa ni Sepulveda nga pinaagi sa maong truth commission mahatagan na og kataposan ang tanang mga isyu ug mahunong na ang mga espekulasyon sa mga tawo kun may nakasapi bang mga opisyales sa gobiyerno sa mga proyekto ni Arroyo.

Gitataw hinuon ni Sepulveda nga wala sila masayod kun malakip ba sa imbestigahon ang mga proyekto ni Arroyo dinhi sa Sugbu apan mipadayag nga andam nila kining tubagon.

Kini tungod kay ang maong commission usa lamang ka fact finding body ug morekomendar lamang kun si kinsa ang manubag sa kaso.

Gitataw usab niini nga ang gobernadora walay gitagoang dokumento sa kontrobersiya sa pagpalit sa lote sa Tinaan, sa Naga nga nalubog sa tubig dagat ug kabakhawan, ang Cebu International Convention Center ug uban pa.

Misugyot si Sepulveda nga ang angayang imbestigahon lamang sa commission mao ang fertilizer scam, ZTE-NBN ug ang Hello Garci controversy. – BANAT NEWS