Kaso vs. 'mastermind' sa ting ambush lig-on-Nerez

CEBU, Philippines - “He is entitled to his own opinion.” Kini ang reaksyon ni Chief Supt. Lani-O Nerez sa pagpanghimakak ni Larry Ting nga wala siyay kalambigitan sa pagbanhig sa iyang uyoang si Nicolas Ting niadtong Hunyo 21 diha sa barangay Cabancalan sa dakbayan sa Mandaue.

Si Larry maoy gipasanginlang mastermind human ang unang nadakpan nga si Edwin Juab niadtong Hunyo 28 sa mga sakop sa Task Force Ting mikooperar sa kapolisan nga miresulta sa pagkasikop usab sa gunman nga 16-anyos ug drayber sa motorsiklo nga si Jordan Miral.

Matud ni Nerez nga ang imbestigasyon sa Task Force Ting nakuha sa hinay-hinay nga paagi ug wala dalidalia hangtud nga nakakuha sila og lead pagkasikop kang Juab nga unang gisitar gumikan sa pagsugal og mahjong diha sa barangay Ermita ning dakbayan.

“Mao bitaw I did not give time frame sa Task Force Ting to solve this case,” pasabot pang Nerez ug midugang nga sagad sa mga suspek mohimakak gyud sa salaod nga gipasangil batok kanila.

Si Larry Ting kinsa gipasakaan og kaso lakip na sa tulo gisikop niadtong Hunyo 29 didto sa iyang pinuy-anan sa barangay Basak sa dakbayan sa Lapulapu.

Si Juab mibutyag nga sukad pa sa miaging tuig giplano ni Larry ang pagpapatay sa uyoan ug sa sinugdanan siya unta maoy mopatay niini apan wala siya makahigayon hangtud nga nahimo nalang siyang middleman sa maong transaksyon.

Matud ni Nerez miabot lang ang oportunidad nga nakakuha sila og lead ug diha-diha wala sila mag-usik og panahon hangtud nga sila nangadakpan, ang utang nga P20 milyones ni Larry sa uyoan maoy gitumbok nga motibo sa pagpapatay niini.

Samtang padayon pa usab ang pagpangita nila og lead ug dugang impormasyon sa sunod nga pagbanhig patay sa maguwang ni Nicolas nga si Manuel Ting diha sa barangay Tisa pagkasunod adlaw.

Matud ni Nerez bisan tuod og ila nang nailhan ang gunman kang Manuel apan wala pa silay lead kun si kinsa ang nagpaluyo niini. – BANAT NEWS