Bana sa kap nga wanted nadakpan

CEBU, Philippines - Bana sa barangay kapitan sa lungsod sa Asturias nga nahimong wanted sulod sa kapin duha ka tuig human nakapusil patay sa iyang silingan, nadakpan sa mga sakop sa Criminal Investigation and Detection Group sa Carmen sa North Cotabato niadtong Hunyo 22.

Ang nadakpan ug anaa karun sa detention cell sa CIDG-7 mao si Wilson Olivio Garces ,38, taga barangay Magcalape sa lungsod sa Asturias ug bana ni kapitan Charina Olivio.

Si Chief Insp. Rene Kyamko ug mga kauban inabagan sa mga sakop sa Carmen Police Station sa North Cotabato misikop kang Olivio pinasikad sa warrant of arrest nga giisyu niadtong Agosto 27, 2008 sa Regional Trial Court (RTC) Branch 29 sa dakbayan sa Toledo sa Presiding Judge nga si Cesar Estrera nga walay gitugot nga piyansa.

Ang pagdakop may kalambigitan sa nahitabong pagpamusil niadtong Pebrero 11, 2008 sa kaadlawon sa barangay Magcalape diin usa ka Edgardo Yangan Lucob ,40, ang gipusil patay.

Subay sa pasiunang imbestigasyon sa kapolisan sa Asturias nasuta nga ang suspek giila nga si Wilson Olivio ug Rodrigo Garcia subay sa testimoniya sa mga saksi.

Gumikan niini sila si Olivio ug Garcia giimbitar sa kapolisan pagkasunod adlaw aron ipaubos sa imbestigasyon apan tungod kay walay testigos nga mibarog gibuhian sila.

Ang armas nga giingong gigamit sa krimen giisyu sa munisipyo ngadto sa asawa niining kapitan nasutang mitakdo sa ebidensyang nakuha diha sa crime scene human sa ballistic examination. Niadtong Pebrero 19, 2008 dunay saksi nga mipakita sa kapolisan ug mihatag sa iyang testimoniya sa maong krimen hinungdan nga napasakaan gyud og kasong murder sila si Olivio ug Garcia sa provincial prosecutors Office sa pagka Pebrero 20.

 “Wala uy dili mana tinuod, naglalis mi ana iya (biktima) manghod ako ila gitumbok. Nagtuo ko nga duna ni sagol politika. Wala ko mosibat, milikay lang ko, basin gidumtan ko nila sa mga igsuon, pagkahitabo ana diha ra ko sa balay,” panghimakak pa sa suspek.

Lakip sa mihimakak sa alegasyon mao ang asawa niining si Charina apan miangkon duna siya’y armas nga hinatag sa munisipyo. – BANAT NEWS