'Kawatan' gitagod og tigbas

CEBU, Philippines - Naglunang sa kaugalingong dugo ang usa ka mag-uuma nga gidudahang kawatan human kini naputos sa samad pinusilan ug tinigbasan pasado alas-8 kagahapon sa buntag sa sitio Lower Roosevelt barangay Busay.

Ang biktima nailhan sa ngalan nga Joel Nuñez, 34, nagpuyo sa maong lugar. Wala pay matumbok ang kapolisan nga responsable sa maong krimen.

Sa pakighinabi sa Banat News ni PO3 Geoffrey Gutual sa Homicide Section mibutyag kini nga ang kapitan sa barangay Busay nga si Yody Sanchez mitaho sa ilang buhatan ug nagpahibalong adunay patay’ng lawas nga napalgan sulod sa usa ka payag.

Matud pa ni Gutual nga base sa gisaysay ni Diolito Camansi, 27, silingan sa biktima ug usa ka mag-uuma nga nianang pagkagabii pasado alas- 9 aduna siyay nadunggang mga pakapaka sa buto sa armas apan wala lang niya panumbalinga kini tungod kay giingong gikapoy siya.

Apan kagahapon sa buntag iyang gikatingala sa diha nga wala na nag-ugmad ang biktima sa iyang giatimang umahan hinungdan nga iyaha kining giduaw sa panimalay niini.

Mao nalay iyang nakit-an sa pag-abli niya sa pultahan diha nga naglunang na kini sa kaugalingong dugo ug wala nay kinabuhi hinungdan nga dali siyang miadto sa barangay.

Si Gutual mihulagway nga nakaangkon og kapin 20 ka samad tinigbasan, daghang samad pinusilan sa kalawasan ug may nag-ungot nga bala diha sa agtang niini.

Walay nakuhang basiyo sa bala apan adunay duha ka slugs nga nakuha diha sa crime scene.

Mibutyag si Gutual nga base sa ilang nakaylap nga impormasyon kalabot sa biktima adunay mitaho kanilang usa kini ka notadong kawatan ug buot pa nila karong subayon ang kamatuuran kabahin niini.

Buot karong subayon sa kapolisan ang background sa biktima aron makakita og lead sa maong kaso.

Samtang pasado alas- singko sa hapon kagahapon ang igsuon sa biktima nga si Cherry Nuñez miduaw sa buhatan sa Homicide Section ug mi-claim sa patay’ng lawas sa iyang igsuon nga nahimutang karon sa Saint Francis Funeral Homes. – BANAT NEWS