Bomb squad misiksik sa Sn. Fernando

CEBU, Philippines - Ang mga sakop sa bomb squad sa Cebu Provincial Police Office (CPPO) misiksik sa municipal hall sa lungsod sa San Fernando pagsiguro kung wala bay bomba gibutang atol sa pag-asumir sa napiling mayor kagahapon sa buntag.

 Si Insp. Carlos Reyes, hepe sa San Fernando Police Station sa pakighinabi niini sa Banat News nagkanayon nga duna siya’y nadawat nga order kagahapon sa buntag gikan sa CPPO kabahin sa himuong pagsiksik sa tibuok building sa municipal hall sa dili pa mo-asumir si mayor-elect Antonio “Abby” Canoy.

Ang mga sakop sa bomb squad sa provincial headquarter misusi sa tibuok building apan wala silay nakitang bomba.

Matud sa hepe nga dunay mipadangat og request ngadto sa provincial headquarter apan wala siya makahibawo kung kinsay mipadangat sa maong request.

Gibutyag usab ni Reyes nga niadtong milabay’ng eleksiyon dunay nadawat nga pagpanghulga si Canoy ug iyang gituohan nga mao kini gibasehan sa request nga nakapakombinser sa kadagkoan sa CPPO.

Si Canoy mipildi ni kanhi Mayor Lakambini “Neneth” Reluya ug nagbinayloay og   pasangil.  – BANAT NEWS