Tomas kuyaw ma-disqualify - Sepulveda

CEBU, Philippines - Gitumbok ni Capitol Consultant on Information Rory Jon Sepulveda si Kongresista Tomas Osmeña sa habagatang distrito sa siyudad sa Sugbo mahimong ma-disqualify sa iyang pagkapili pagka-kongresista sa siyudad sa Sugbo kun makonbikto sa gipasakang kasong kriminal ni Gob. Gwendolyn Garcia.

Si Garcia mikiha kang Osmeña tungod sa kalapasan sa election laws nunot sa pagbutang og mga billboard sa South Road Properties (SRP) nga nagdaot sa gobernador sa wala pa ug sa human na ang eleksiyon niadtong Mayo 10.

Matud pa ni Sepulveda nga si Garcia gyud ang nangunay pagpasaka sa nahisgutang criminal complaint ngadto sa Commission on Election-Manila niadtong Hunyo 4, 2010 gawas sa administrative complaint nga gipasaka gihapon sa gobernadora batok ni Osmeña sa wala pa ang automated election.

Si Sepulveda nagkanayon nga ang gipasakaan sa gobernadora mao ra gyud si Osmeña tungod kay miangkon man kini atubangan sa mga sakop sa media ug napatik mismo sa mga lokal nga pamantalaan nga tangtangon ni Osmeña ang iyang gibutang nga billboard kun manduan siya sa Comelec.

Sumala pa ni Sepulveda nga ang salaod nga nahimo ni Osmeña usa ka election offense ug ang silot niini mao ang pagkapriso sa dili mominus unom ka bulan apan dili ma-aplay ang probation ug ang labing dakong silot mao ang “perpetual disqualification from holding public office.”

Ang mga billboard naghulagway sa mga binuhatan ni Garcia. Usa na niini ang “SUP” kun South Underwater Properties nga nagpasabot sa Balili lot sa Naga nga gipalit sa Kapitolyo og sobra P90 milyones bisan sobra sa katunga niini naglubog sa tubig-dagat. – BANAT NEWS