CEBU, Philippines - Patay’ng lawas sa wala mailhing lalaki nakit-ang naglutaw-lutaw sa baybayon kagahapon sa alas 8:30 sa kabuntagon diha sa sitio Bato, barangay Ermita ning dakbayan sa Sugbo.
Ang maong lalaki nagsul-ob og green camouflage ug checkered nga shorts, niwang ang panglawas, ug gibanabanang 5’5” ngadto sa 5’6” ang gitas-on ug 60 ngadto sa 70-anyos.
Usa ka Marlon Fernandez, 28, residente sa maong dapit maoy nakakita sa patay’ng lawas samtang sakay sa iyang sakayan diha sa baybayon.
Daling gipahibalo ni Fernandez ang tanod nga si Edgardo Dico kinsa mao nay mitawag sa kapolisan pinangulohan ni Sr. Insp. Renario Agustin sa Carbon Police Station ug ni SPO2 Sylvannus Abella sa Crime Scene Investigation Unit.
Walay nakitang timailhang may foul play sa patay’ng lawas nga karon anha gibutang sa Cosmopolitan Funeral Homes aron sa pag-awtopsiya. – BANAT NEWS