Radaza nanumpa na

CEBU, Philippines - Si kanhi mayor Arturo Radaza hingpit nang mobiya sa maong katungdanan human mapupos ang iyang ikatulong termino aron molingkod na usab sa bag-ong katungdanan isip unang kongresista sa Lone Congressional District sa dakbayan sa Lapulapu.

Ang bag-ong mayor karon sa Lapulapu mao na ang iyang asawa nga si Mayor Paz Radaza.

Kauban ni Ginang Radaza nga molingkod sa katungdanan sa maong dakbayan mao si kanhi konsehal Marcial Ycong kinsa moserbisyo usab sa iyang unang termino isip bise mayor sa dakbayan.

Ang 12th Lapulapu City Council nga pangulohan ni Bise Mayor Ycong pagalangkoban usab sa mga sakop sa konseho nga naglakip sa mga nasublian sa katungdanan ug ingon mga bag-ong napili nga mga konsehal.

Naglakip kanila mao sila si Harry Don Radaza, Eduardo Patalinghug ug Roque Wagwag kinsa moserbisyo sa ilang unang termino.

Samtang ang mosubli usab pagsilbe sa ilang katungdanan mao sila si konsehal Efren Herrera, Cornillo Pahang, Junrey Gestopa, Titing Senerpida ug uban pa.

Si Ycong mibutyag nga sabotan pa nila ang paghatag og mga komitibang dumalahon ang matag konsehal sa dakbayan.  –  BANAT NEWS